«Հ.Մ.Ը.Մ.-ՖՐԱՆՍ, 50 ՏԱՐԵԿԱՆ, 50 ՊԱՏՄՈՒԹԻՒՆ» ԳԻՐՔԻՆ ԳԻՆԵՁՕՆԸ
Կան պահեր, որոնք պատմութիւն կը գրեն, ու կան պատմութիւններ, որոնք կեանքեր ու ապրումներ կը ստեղծեն։
Նման դրսեւորում մըն էր 7 Փետրուար 2025-ի Հ.Մ.Ը.Մ.-Ֆրանսի ձեռնարկը, որ տեղի ունեցաւ Հ.Մ.Ը.Մ.-Ֆրանսի նորաշէն ակումբին մէջ, որուն պաշտօնական բացման արարողութիւնը պիտի կատարուի մօտ ապագային։
Երեկոյին շարժառիթն էր «Հ.Մ.Ը.Մ.-Ֆրանս, 50 տարեկան, 50 պատմութիւն» գիրքին (ֆրանսերէն) գինեձօնը։ Գիրքի հեղինակ-պատմողն է Հ.Մ.Ը.Մ.ի Կեդրոնական Վարչութեան անդամ եղբ. Սեւակ Թորոսեան, որ նման աշխատանքի մը նախաձեռնած է քանի մը տարի առաջ եւ Հ.Մ.Ը.Մ.ականներու յիշողութիւններու ու պատմութիւններու ընդմէջէն կազմած է Հ.Մ.Ը.Մ.-Ֆրանսի ապրուած կեանքէն դրուագներու շարք մը, որոնք իրենց մէջ կը կրեն յաջողութիւններու թէ դժուարութիւններու հետքեր, երբեմն տեսակէտներ ու շատ անգամ յիշատակներ։
Գիրք մը, որ վաւերագրական ըլլալու չի ձգտիր, այլ՝ տալու պատմուածներն ու ապրումները։
Ձեռնարկին ներկայ էին Իսի լէ Մուլինոյի քաղաքապետ Անտրէ Սանթինի, փոխ քաղաքապետ Յարութ Խանճեան, մասնաճիւղին «Իմաստուններու խորհուրդ»ը, վարչականներ եւ աւելի քան 120 նախկին ու ներկայ անդամներ։
Երեկոյին բացման խօսքը արտասանեց վարչութեան կողմէ եղբ. Ռաֆֆի Պաղտասարեան, որ ողջունեց քաղաքապետ Սանթինիի հաւատքը Հ.Մ.Ը.Մ.ի նկատմամբ եւ անոր ցուցաբերած ճիգը, որպէսզի Հ.Մ.Ը.Մ.-Ֆրանսը իր կեդրոնը ունենայ Իսի լէ Մուլինոյի մէջ, ինչ որ Հ.Մ.Ը.Մ.ականներու տարիներու երազն էր՝ օժտուիլ իր սեփական ակումբով։
Այնուհետեւ իր սրտի խօսքը փոխանցեց քաղաքապետ Սանթինի, որմէ ետք եղբ. Սեւակ Թորոսեան ներկայացուց իր աշխատանքը, անոր նպատակն ու անցած ճամբան։ Եղբ. Թորոսեան նաեւ ընթերցեց գիրքէն հատուածներ, ապրեցնելով այդ պահերը բոլորին մօտ։
Տեղւոյն վրայ վաճառուեցան գիրքէն օրինակներ։
Աւարտին տեղի ունեցաւ քոքթէյլ մը, ուր մտերմիկ մթնոլորտի մէջ Հ.Մ.Ը.Մ.ականներ վերյիշեցին իրենց անցեալի օրերը, ոգեւորուեցան ներկայով, ու նաեւ փայփայեցին լուսաւոր ապագայի մը երազը։
