ԱՊՐԻ՛Ք ՏՂԱՔ
Արդար գոհունակութեամբ եւ անխառն հպարտութեամբ կ’ողջունենք ձեր շրջանի Նաւասարդեան մարզախաղերուն իրագործումը։
Ուրախալի է տեսնել Հ.Մ.Ը.Մ.ական տարբեր սերունդներու տղաք ու աղջիկներ, որոնք հպարտ ճակատներով, հայութեան արժէքներով լեցուն հոգիով ու աչքերով, Հ.Մ.Ը.Մ.ին կու գան իբրեւ մարզիկ թէ սկաուտ, զաւակ թէ ծնողք։
Մեծ է երէց սերունդին երախտիքը շրջանին մէջ։ Բազմաթիւ խոնարհ առաջնորդներ եկած ու անցած են շրջանի Հ.Մ.Ը.Մ.ի մասնաճիւղերէն։ Այսօր, անոնք ծնողներ են, հայրեր ու մայրեր, թերեւս ալ՝ մեծ հայրեր ու մեծ մայրեր, սակայն անոնք կը շարունակեն նիւթապէս ու բարոյապէս թեւ ու թիկունք կանգնիլ միութեան համահայկական ու տեղական նախաձեռնութիւններուն։ Յարգա՛նք արժանաւորաց։
Յարգա՛նք նաեւ միջին սերունդի ներկայացուցիչներուն, անոնց՝ որոնք մօտիկ անցեալի հարուստ ներշնչումներով այսօր միութենական գործունէութեան յարմար մթնոլորտ եւ միջավայր ստեղծած են։ Պատնէշի վրայ են։ Իրենց գործերով ու հեռանկարներով նորանոր յաջողութիւններու կ’առաջնորդեն շրջանը։
Իսկ ինչ խօսք հազարաւոր այն փոքրերուն, կրտսեր մարզիկներ թէ սկաուտներ, որոնք Հ.Մ.Ը.Մ.ի մասնաճիւղերուն մէջ հասակ կը նետեն խանդավառ ու հաւատաւոր մթնոլորտի մէջ, պաշտպանուած հայեցի դաստիարակութեան վահանով, ձուլուած՝ հայ ժողովուրդի, եկեղեցւոյ, հայրենիքի եւ իտէալներու անկորնչելի սրբութիւններով։
Արդար գոհունակութեամբ մը պէտք է ընդունիլ, որ անո՛նք են մեր ապագան եւ յաւերժութիւնը մարմնաւորող քաջարի դրօշակակիրները։ Անոնց խիտ ու խրոխտ շարքերուն կ’երթայ մեր ցնծութիւնը։ Անոնց ժպիտը պայծառ ու գօտեպնդիչ ուժ է մեզի՝ դժնդակ մեր պայմաններուն ու դժուարին կացութիւններուն մէջ։
Անոնց աչքերուն մէջ Հ.Մ.Ը.Մ.ականի ուխտը կայ, անոնց բերաններուն մէջ իրենց անուններէն աւելի երկու մեծ անուններ կան.- Հայաստան ու Հայութիւն։
Անոնց սրտերուն մէջ անթեղուած է կրակը մեր պատմութեան, քանի անոնց հոգիներն ու միտքերը հերկուած են մեր ազգային հարուստ ժառանգութեամբ։
Ա՛յս է իսկական Հ.Մ.Ը.Մ.ը, երեք սերունդ միեւնոյն յարկին տակ, քով-քովի, ներդաշնակ գոյակցութեամբ։ Իսկ այս բոլորը ապրեցնողը, այս բոլորին աղբիւրը յաւերժական հայութիւնն է, որ գիտէ այսքան գործի դիմաց խոնարհիլ ու կրկնել՝
- Ապրի՛ք տղաք, ձեզմով ապրինք մենք։
Հ.Մ.Ը.Մ.Ի
ԿԵԴՐՈՆԱԿԱՆ ՎԱՐՉՈՒԹԻՒՆ
Հ.Մ.Ը.Մ.ի Կեդրոնական Վարչութեան խօսքը՝ Արեւելեան Մ. Նահանգներու Նաւասարդեան 33-րդ եւ Արեւմտեան Մ. Նահանգներու Նաւասարդեան 48-րդ մարզախաղերուն առիթով։