ԱՐԱՐԱՏԸ ԽՈՐՀՐԴԱՆԻՇ Է ՄԵՐ ՄԻՈՒԹԵԱՆ ՍԿԶԲՈՒՆՔՆԵՐՈՒՆ
29 Մարտ 2025-ին, Հ.Մ.Ը.Մ.ի Լոնտոնի Մեկուսի շրջանը թատերական ներկայացումով մը նշեց «Սկաուտի Օր»ը: Ներկայացումը նուիրուեցաւ Արարատին եւ կրեց «Դէպի Արարատ» վերնագիրը:
«Դէպի Արարատ»ը պատմութիւնն էր խումբ մը սկաուտներ, որոնք Արարատի գագաթը կը բարձրանան։ Ճամբան տեղի կ’ունենան կարգ մը զարգացումներ, որոնք կը ծանօթացնեն Արարատի կարեւորութիւնը, իբրեւ ազգային ինքնութեան խորհրդանիշ եւ Հ.Մ.Ը.Մ.ի ընդհանրական նպատակներու արտայայտիչ։
Այս առիթով, մասնաճիւղին խօսքը փոխանցեց վարչութեան ատենապետ քոյր Ալենոյշ Գրիգոպեանս։ Ստորեւ՝ խօսքին ամբողջութիւնը։
Գերաշնորհ Յովակիմ Եպս. Մանուկեան,
Արժանապատիւ Տէր Նշան Քհնյ. Ալավերտեան,
Յարգելի հիւրեր եւ ծնողներ,
Սիրելի քոյրեր եւ եղբայրներ,
Հ.Մ.Ը.Մ.ի Լոնտոնի Մեկուսի շրջանի վարչութեան անունով բարի գալուստ կը մաղթենք ձեզի Հ.Մ.Ը.Մ.ի Լոնտոնի «Սկաուտի Օր»ուան տօնակատարութեան: Այս առիթով, մեր սիրելի սկաուտները եւ խմբապետները պատրաստած են շարք մը ներկայացումներ, որոնք վստահ եմ որ բոլորս միասին պիտի վայելենք այսօր:
Անցեալ տարի, Հ.Մ.Ը.Մ.ի Լոնտոնի Մեկուսի շրջանը տօնեց իր 45-ամեակը: Շատ հպարտ ենք, որ մեր միութիւնը հասած է այս նշանաւոր մղոնաքարին: Միւթեանս պատրաստած ծրագիրները եղան մեր ներկան անցեալին եւ ապագային միացնողը: Այնչափ կարեւոր է, որ Հ.Մ.Ը.Մ.ի Լոնտոնի շարքերէն անցած անդամները միութիւնը նկատեն իբրեւ ՄԵՐ միութիւնը, որ իրաքանչիւրիս կը պատկանի, եւ բոլորիս պարտականութիւնն է պահել եւ շարունակել զայն: Տեսնելով անցեալ տարուան ծրագիրերուն յաջողութիւնը, կրնանք վստահ զգալ, որ միութեանս ապագան ապահով է, որովհետեւ Հ.Մ.Ը.Մ.ի Լոնտոնի անդամները եւ շրջանակը պատրաստ են յառաջ տանելու մեր միութիւնը:
Այս տարուան «Սկաուտի Օր»ուան ծրագիրը նուիրուած է Արարատին: Հ.Մ.Ը.Մ.ը աշխարհասփիւռ միութիւն է եւ մեր ընդհանուր նպատակները ուղղուած էն դէպի հայ երիտասարդութեան հայապահպանում, ապահովելու մեր ազգին ապագան: Միութիւնս ստեղծուած է 1918-ին, երբ մեր հիմնադիրները որոշեցին Հայոց Ցեղասպանութեան որբերը մէկտեղել եւ խնամել: Տարիներու ընթացքին Հ.Մ.Ը.Մ.ը շարունակ զարգացուցած է իր ծրագիրները հայութեան կարիքներուն համապատասխան, եւ այսօր կարեւոր դեր կը կատարէ մեր համայնքի երիտասարդներուն համար, քաջալերելով որ անոնք պահեն իրենց հայկական ինքնութիւնը եւ ապահովեն մեր ազգին ապագան:
Հ.Մ.Ը.Մ.ի նշանաբանն է «Բարձրացի՛ր-Բարձրացուր»: Այսօր պիտի տեսնենք այս նշանաբանին իրականացումը ո՛չ միայն գաղափարական իմաստով, այլեւ՝ ֆիզիքապէս եւ Արարատ լերան լանջերուն:
Արարատը խորհրդանիշ է մեր միութեան սկզբունքներուն: Մեր երիտասարդներուն կը յիշեցնէ հայ ազգին անցած դժուարութիւնները: Զանոնք կը մղէ դէպի արդարութիւն, դէպի յաղթանակ եւ դէպի Ազատ, Անկախ ու Միացեալ Հայաստան:
