ԵՂԲ. ՎԱԶԳԷՆ ԳԱԼԱՅՃԵԱՆ Կ’ԱՐԺԱՆԱՆԱՅ 2025-Ի «ՏԻՊԱՐ Հ.Մ.Ը.Մ.ԱԿԱՆ» ՏԻՏՂՈՍԻՆ
Հ.Մ.Ը.Մ.ի Արեւմտեան Մ. Նահանգներու Շրջանային Վարչութիւնը 2025-ի «Տիպար Հ.Մ.Ը.Մ.ական»ի տիտղոսը շնորհեց Հ.Մ.Ը.Մ.ի Ինլընտ Իմփայրի «Արազ» մասնաճիւղի անդամ, վաստակաշատ Հ.Մ.Ը.Մ.ական եղբ. Վազգէն Գալայճեանին, նկատի ունենալով եղբօր երկար տարիներու բեղուն գործունէութիւնը, համեստ ու ազնիւ նկարագիրով միշտ ծառայելու պատրաստակամութիւնը Հ.Մ.Ը.Մ.ին:
73-ամեայ եղբ. Գալայճեան մարմնաւորումը կը հանդիսանայ Հ.Մ.Ը.Մ.ի առաջնորդող նշանաբանին՝ «Բարձրացի՛ր-բարձրացուր»ին։ Անոր Հ.Մ.Ը.Մ.ական կեանքը սկսած է Լիբանանէն եւ շարունակուած է Մ. Նահանգներ, ուր 1976-էն ի վեր ան գործօն անդամ է։
«Հ.Մ.Ը.Մ.ը իմ էութեանս մէկ մասն է», նշեց եղբ. Գալայճեան։ «Իմ ընտանիքիս կապը Հ.Մ.Ը.Մ.ին հետ մօտաւորապէս մէկ դարու պատմութիւն ունի. Լիբանանի մէջ հայրս եղած է Հ.Մ.Ը.Մ.ի առաջին ֆութպոլի խումբին անդամներէն»։
Տարիներու ընթացքին եղբ. Գալայճեան ստանձնած է պատասխանատու զանազան պաշտօններ. եղած է մասնաճիւղի վարչութեան ատենապետ, քարտուղար եւ խորհրդական։ Ներկայիս ան կը վարէ Ինլընտ Իմփայրի «Արազ» մասնաճիւղի քարտուղարի պաշտօնը՝ շարունակելով իր ներդրումը ունենալ իբրեւ հաւատաւոր միութենական։
Լիբանանէն մինչեւ Մ. Նահանգներ եղբ. Գալայճեան իր կեանքը նուիրած է երիտասարդ մարզիկներու եւ ապագայ ղեկավարներու դաստիարակութեան գործին։ «Երիտասարդներ պատրաստելը աւելի կենսական է, քան միայն մարզանքը. դաստիարակութիւնը արժէքներու սերմանում է, ինչ որ երիտասարդները կը դարձնէ աւելի ուժեղ եւ կարող առաջնորդներ», բացատրեց ան։
Ան կը հաւատայ, որ Հ.Մ.Ը.Մ.ի մարզական կեանքը կը խրախուսէ նուիրումի եւ ընկերասիրութեան ոգին՝ ապահովելով առողջ միջավայր։ «Ան դաստիարակիչ փորձառութիւն մըն է, որ կը զարգացնէ մրցակցութեան ոգին՝ միաժամանակ ամրապնդելով մեր համայնքի միասնութիւնն ու կապերը», նշեց Գալայճեան։
Ծառայութեան մասին իր տեսակէտը պարզ է, բայց խորիմաստ՝ «Ես հին դպրոցի մարդ եմ։ Իմ ժամանակս ու ջանքերս կը նուիրեմ առանց հատուցումի կամ ակնկալիքի»։ Երբ հարցուցինք, թէ ի՛նչ պատգամ ունի երիտասարդ կամաւորներուն, ան աւելցուց. «Մենք կը ծառայենք անկեղծ նուիրումով՝ առանց փոխադարձ ակնկալիքի։ Այս տիտղոսը մեծ պատիւ է, սակայն անոր հետ կամ առանց անոր, ես պիտի շարունակեմ ծառայել Հ.Մ.Ը.Մ.ի բարգաւաճման ի խնդիր»։
Եղբ. Գալայճեան անդրադարձաւ Հ.Մ.Ը.Մ.ի զարգացման՝ բաղդատելով անոր ներկայութիւնը Լիբանանի եւ Արեւմտեան Մ. Նահանգներու մէջ։ «Լիբանանի մէջ մենք կը մրցէինք տարբեր ազգերու, կրօններու եւ մշակոյթներու տէր խումբերու դէմ։ Մեր յաղթանակը միայն խումբին չէր պատկաներ, այլ կը խորհրդանշէր Հ.Մ.Ը.Մ.ի եւ ամբողջ հայութեան յաղթանակը», նշեց ան։ «Այստեղ, մենք կը մրցինք մեր եղբայրներուն եւ քոյրերուն հետ՝ միացած Հ.Մ.Ը.Մ.ի անսասան դրօշին տակ։ Յաղթանակով թէ պարտութեամբ, մեր միասնութեան ոգին է որ կը զօրացնէ եւ կը ներշնչէ բոլոր մասնակիցները»։
Անոր առաջնորդութիւնը եւ ներդրումը մեծ դեր ունի Հ.Մ.Ը.Մ.ի Արեւմտեան Մ. Նահանգներու շրջանին մէջ, նպաստելով կազմակերպութեան առաքելութեան ֆիզիքական, բարոյական եւ ընկերային զարգացման։
Եղբ. Վազգէն Գալայճեանի 2025-ի «Տիպար Հ.Մ.Ը.Մ.ական» տիտղոսին արժանացումը ո՛չ միայն կը մեծարէ անոր տասնամեակներու նուիրեալ ու անշահախնդիր ծառայութիւնը, այլեւ կը վերահաստատէ Հ.Մ.Ը.Մ.ի մշտական առաքելութիւնը՝ ձեւաւորելու հայկական երիտասարդութիւնը եւ սերունդէ սերունդ պահպանելու մեր մշակութային ժառանգութիւնը։
«Վերջաւորութեան, Հ.Մ.Ը.Մ.ը միշտ յաղթական է», ըսաւ եղբ. Գալայճեան։ «Նայեցէ՛ք, թէ ի՛նչ հիմնած ենք Հարաւային Քալիֆորնիոյ մէջ. մեր աճը արտասովոր է, եւ ես անհամբեր կը սպասեմ այս առաքելութիւնը շարունակելու՝ իմ եղբայրներուս ու քոյրերուս կողքին»։