ԸՆԴՈՒՆԵԼՈՒԹԻՒՆ՝ Ի ՊԱՏԻՒ ԵՂԲ. ԺԱԳ ԻՒՐԷՃԵԱՆԻ
Երկուշաբթի, 2 Յունիս 2025-ին, Հ.Մ.Ը.Մ.ի Երուսաղէմի ընտանիքը իր ակումբին մէջ մեծ ուրախութեամբ հիւրընկալեց նախկին սաղիմահայ եղբ. Ժագ Իւրէճեանը։ Եղբօր ընդունելութեան ներկայ էին Հ.Մ.Ը.Մ.ական երէց անդամներ։ Մթնոլորտը մտերմիկ էր, անկեղծ եւ հարազատ։
Ընդունելութիւնը կը նպատակադրէր շնորհակալութիւն յայտնել եղբօր՝ իր ցուցաբերած սրտագին օժանդակութեան եւ Հ.Մ.Ը.Մ.ին շարունակական աջակցութեան համար։
Եղբ. Ժագ յուզուած անդրադարձաւ իր յուշերուն՝ նշելով, որ մօտ 60 տարիներ առաջ ինքն ալ եղած է Հ.Մ.Ը.Մ.ի Երուսաղէմի սկաուտ եւ միշտ հաւատացած է միութեան հայապահպան գործին եւ դաստիարակչական առաքելութեան՝ մանաւանդ հայ ժողովուրդի դժուարին օրերուն։
Ան ըսաւ, որ ի պատիւ իրեն կազմակերպուած հաւաքոյթը իր մէջ վերազարթնեց մանկութեան տարիներու հարազատ զգացումները, եւ ինք երախտապարտ է, որ իր հայեցի դաստիարակութիւնը եւ նախնական ուսումը ստացած է Երուսաղէմի մէջ։
Մտերմիկ սեղանին շուրջ խօսք առնող եղբայրները դրուատեցին եղբ. Ժագին բարեմասնութիւնները, վերյիշեցին Հ.Մ.Ը.Մ.ական անցեալի օրերը եւ նորանոր յաջողութիւններ մաղթեցին եղբօր ծրագիրներուն։