ՀԱՅ ՍԿԱՈՒՏԻՆ ՆՈՒԻՐՈՒԱԾ ԵՐԵՔ ՕՐԵՐ...
Գանատայի Համիլթըն եւ Սէնթ քաթրինզ մասնաճիւղերու քոյրերն ու եղբայրները մասնակցեցան վարչութեան, խորհուրդի եւ խմբապետութեան կողմէ կազմակերպուած եռօրեայ սեմինարին, որ տեղի ունեցաւ 7-9 Մարտ 2025-ին, Սէնթ Քաթրինզի հայաբոյր կեդրոնին մէջ։
Սկաուտական գիտելիքներով հարուստ այս սեմինարին քոյրերն ու եղբայրները ունկնդրեցին սկաուտական գիտելիքներ, սորվեցան սկաուտական մարզանքներ, մանրամասնօրէն ծանօթացան Հ.Մ.Ը.Մ.ի եւ սկաուտութեան պատմութեան՝ հարստացնելով սկաուտական իրենց գիտելիքները։
Երգերու եւ կանչերու ուսուցման ընթացքին անոնք մեծ խադավառութեամբ լսեցին եւ սորվեցան ազգային երգեր, սկաուտական կանչեր եւ ուրախութեամբ կատարեցին իրենց վստահուած աշխատանքը։
Հայ սկաուտը տարիներ շարունակ շառաւիղը եղած է Վարդանանց սերունդին եւ պահապանը` հայ մշակոյթին ու կրօնքին։ Արդարեւ, սկաուտներ մօտէն ծանօթացան Վարդանանց պատմութեան եւ ձեռային աշխատանքներով ամբողջացուցին պատմութիւնը։
Սեմինարի աւարտին տեղի ունեցաւ սրահային տօնակատարութիւն՝ նուիրուած «Հայ սկաուտի օր»ուան։ Տօնակատարութեան ներկայ էին Համիլթընի վարչութեան ատենապետ եղբ. Արիս Աբգարեան, զոյգ մասնաճիւղերու վարչական քոյրերն ու եղբայրները, համակիրներ եւ ծնողներ։
Տօնակատարութիւնը սկիզբ առաւ «Ով հայ արի» քայլերով, որմէ ետք Սէնթ Գաթրինզի մասնաճիւղի վարչութեան ատենապետուհի քոյր Մարիա Քէշիշեան ընթերցեց բացման խօսքը։ Քոյրը նշեց եւ աչքի առաջ բերաւ ազգայնաշունչ ոգին Վարդանանց, որոնք յանուն կրօնքի եւ հաւատքի զոհաբերեցին իրենց կեանքը՝ վսեմ օրինակ դառնալով նորհաս սերունդին։ Քոյր Մարիա պատասխանատուութեան հրաւիրեց բոլոր սկաուտները, որպէսզի արժանաւոր ժառագորդները ըլլան Վարդանանաց հերոսամարտին՝ միշտ բարձր դասելով իրենց հաւատքն ու ազգութիւնը։
Քոյերեր Փարելի Քէշիշեան, Ալիս Այվազեան, Բարտի Օհան, Սոնիա Այվազեան, Մարալ Այվազեան, Թալիա Էլիա եւ եղբ. Պերճ Մուրատեան տպաւորիչ առոգանութեամբ մը ընթերցեցին միջազգային եւ հայ սկաուտութեան ծագումին, սկաուտի դաւանանքին, սկաուտութեան եւ Հ.Մ.Ը.Մ.ի նշանաբանին մասին տեղեկութիւններ։
Տօնակատարութեան ընթացքին գնահատելի էր քոյրերու եւ եղբայրներու կողմէ բեմականացուած Վարդանանց հերոսամարտը, որ ամենայն բծախնդրութեամբ պատմութիւնը պատմեցին եւ համոզիչ խաղաղարկութեամբ ներկայացուց պատմական դրուագներ, արժանանալով ներկաներու գնահատանքին։
Յայտագիրին ընթացքին սկաուտներու փունջ մը ազգային երգերու գեղեցիկ երգեցողութիւնը, բերկրալի պահեր պարգեւեց ներկաներուն։
Գաւազանով մարզանքի համահաւասար շարժումները երանգաւորեցին յայտագիրը։
Խումբ մը քոյրերու յունական պարի ներկայացումը բարձր խանդավառութիւն արձանագրեց ներկաներուն մօտ, որոնք ծափողջոյններով գնահատեցին ներկայացումը։
Բուրգի հաւաքական ներկայացումը եռանդուն մթնոլորտ ստեղծեց ներկաներուն մօտ։
Հանդիսութեան աւարտին տեղի ունեցաւ հաստատագիրներու բաշխում եւ «Յառաջ նահատակ» քայլերգով վերջ գտաւ տօնակատարութիւնը։