ՀԱՅ ՍԿԱՈՒՏ ԸԼԼԱԼԸ ՏԱՐԱԶ ԿՐԵԼԷՆ ԱՆԴԻՆ Է
Հ.Մ.Ը.Մ.-Ֆրանսի Սկաուտ. Խորհուրդին անունով հպարտութեամբ խօսք կ’առնեմ այսօր՝ «Հայ սկաուտի օր»ուան առիթով, միասին նշելու այն ինչ որ բոլորս կը միացնէ. մեր նուիրումը հայ սկաուտութեան արժէքներուն եւ մեր կապը Հ.Մ.Ը.Մ.ի ժառանգութեան հետ։
Աւելի քան մէկ դար է, որ Հ.Մ.Ը.Մ.ը անհատականութիւններ կը կերտէ, սերունդներ կը կամրջէ եւ հայկական ինքնութիւնը կը պահպանէ։ Մեր նշանաբանը՝ «Բարձրացի՛ր-բարձրացուր»ը այսօր այն ուժգնութեամբ կը հնչէ, ինչպէս 1918-ին, երբ մեր շարժումը ծնաւ ցաւոտ անցեալի մոխիրներէն՝ մարմնաւորելու մեր ժողովուրդին յոյսն ու վերածնունդը։
Հայ սկաուտ ըլլալը տարազ կրելէն անդին է։ Անիկա կը նշանակէ տէր կանգնիլ հազարամեայ մեր պատմութեան եւ նուիրուիլ համընդհանուր արժէքներու պաշտպանութեան։ Տարազ կրելով կը սորվինք ﬕասին ապրիլ, բնութիւնը յարգել, ըլլալ ինքնուրոյն, պատասխանատու եւ ղեկավար անձեր, միշտ հաւատարիմ մնալով մեր հայկական ինքնութեան։
Այսօր յուզումով կը դիտեմ մեր ամենափոքր սկաուտները՝ գայլիկ-արծուիկները, որոնք կը յայտնաբերեն բարեկամութեան, ինքնազարգացման եւ չարքաշութեան հաճոյքները։ Կը տեսնեմ ինչպէս մեր պատանի արի-արենոյշները մարտահրաւէրներու դիմաց կը հասուննան եւ աւելի ինքնավստահ կը դառնան։
Յատկապէս հպարտ եմ ձեզի հետ բաժնեկցելու 17 տարեկան եւ վեր մեր երիտասարդներուն` երէց-պարմանուհիներու նորակազմ փաղանգը։ Ահաւասիկ կարեւոր քայլ մը, որ կը հաստատէ մեր կամքը՝ ուղեկցելու մեր սկաուտներուն դէպի չափահասութեան տարիներ, պատրաստելով զանոնք դառնալու վաղուան առաջնորդները։ Նորակազմ այս խումբը ապացոյց է Հ.Մ.Ը.Մ.-Ֆրանսի կենսունակութեան, ինքզինք վերանորոգելու կարողութեան եւ աւանդութիւններուն հանդէպ իր հաւատարմութեան։ Այս երիտասարդները կը ներկայացնեն մեր ներկան ու ապագան. անոնք այսօրուան օրինակներն են մեր ամենափոքր սկաուտներուն, իսկ վաղուան՝ Հ.Մ.Ը.Մ.-Ֆրանսի սիւները։
«Հայ սկաուտի օր»ը առիթ է յիշելու, որ մենք մաս կը կազմենք մեծ ընտանիքի մը, որ կը տարածուի Ֆրանսայի սահմաններէն անդին։ Ամերիկայէն մինչեւ Լիբանան, Աւստրալիայէն մինչեւ Հայաստան, Արժանթինէն ﬕնչեւ Գանատա, հազարաւոր հայ սկաուտներ այսօր նոյն արժէքները կը բաժնեկցին։ Այս յատուկ օրը եկէք միասին վերանորոգենք մեր խոստումը՝ ըլլալու հաւատարիմ Աստուծոյ, ազգին ու հայրենիքին։ Միշտ օգնելով ուրիշին եւ մեր լաւագոյնը ընելով՝ ըլլալու արժանի մեզի վստահուած ժառանգութեան եւ մեր փորձառութեամբ հարստացած՝ զայն փոխանցելու գալիք սերունդներուն։
Կ’ուզեմ շնորհակալութիւն յայտնել մեր բոլոր ղեկավարներուն, որոնք իրենց նուիրումով ու կամաւոր աշխատանքով ամէն օր կ’ապրեցնեն Հ.Մ.Ը.Մ.ը։ Շնորհակալութիւն ձեզի, սիրելի սկաուտներ, ձեր խանդավառութեան, կորովին եւ հաւատարմութեան ոգիին համար։ Վերջապէս, սիրելի ծնողներ, այս շարքերը ձեզի կը պարտինք։ Շնորհակալութիւն ձեր վստահութեան եւ աջակցութեան համար։
Կ’ուզեմ նաեւ շնորհակալութիւն յայտնել բոլոր մայրերուն, որոնք իրենց զաւակները թէ՛ հայ եւ թէ՛ Հ.Մ.Ը.Մ.ական կը դաստիարակեն։
Ձեր տօնը շնորհաւո՜ր։
Ինչպէս Հ.Մ.Ը.Մ.ի 1919-ի առաջին Ծրագիր-Կանոնագիրը կ’ըսէ.-
«Հայ մայրե՛ր,
Վստահութեամբ մեզի յանձնեցէք ձեր զաւակները, զանոնք պիտի վերադարձնենք ձեզի աւելի ազնիւ, աւելի հզօր, արի եւ գորովոտ»։
Բարձրացի՛ր-բարձրացուր։