Հ.Մ.Ը.Մ.ԱԿԱՆ ՀԱՐՈՒՍՏ ԿԵԱՆՔ ՄԸ ԱՊՐԱԾ ԵՂԲ. ՆԱԶԱՐԷԹ ՍԱՊՈՒՆՃԵԱՆԻ ՅԻՇԱՏԱԿԻՆ
Հ.Մ.Ը.Մ.ի Անթիլիասի մասնաճիւղ
ԱՆԹԻԼԻԱՍ
Կանգնած ենք լռութեան մէջ` այնպիսի եղբօր մը յիշատակին առջեւ, որ իր բովանդակ կեանքը ապրեցաւ ո՛չ միայն իր ընտանիքին, այլեւ՝ իր ժողովուրդին, հայրենիքին եւ Հ.Մ.Ը.Մ.ին ծառայելու բարձր գիտակցութեամբ:
Խոր տխրութեամբ եւ խոնարհ սիրտով հաւաքուած ենք հրաժեշտ տալու Հ.Մ.Ը.Մ.ական մեր սիրելի երէց եղբօր` Նազարէթ Սապունճեանին։ Միութեան նուիրեալ անդամներէն մէկուն, որուն կեանքը կենդանի վկայութիւն մը եղաւ մեր երդումին, մեր նպատակին ու մեր հաւատքին:
Եղբ. Նազարէթ Հ.Մ.Ը.Մ.ի շարքերուն միացած է երիտասարդ տարիքին` մղուած այն ազնուաշունչ գաղափարներով, որոնք մեզ միացնող հիմքն են` անվերապահ նուիրում հաւաքական գործին: Շուտով, իբրեւ նուիրեալ ու գործուն անդամ, ան կը ստանձնէ Հ.Մ.Ը.Մ.ի Անթիլիասի մասնաճիւղի Սկաուտ. Խորհուրդի ատենապետութեան պատասխանատու պաշտօնը: Իր ատենապետութեան տարիներուն ան ո՛չ միայն կը նպաստէ շարժումին կազմակերպչական աշխատանքներուն, այլեւ՝ իր բարոյական հովանաւորութեամբ եւ նիւթական օժանդակութեամբ մեծապէս օգտակար կը դառնայ մասնաճիւղի շեփորախումբին հիմնադրման: Այն շեփորախումբը, որ այսօր աշխոյժ ու տեսանելի ներկայութիւն է եւ վերածուած է սկաուտական գործունէութեան կարեւոր բաղադրիչներէն մէկուն, իր նուագով կը խանդավառէ մասնաճիւղին սկաուտական եւ մարզական բոլոր ձեռնարկները: Կը խոստանանք, եղբա՛յր, որ մասնաճիւղի շեփորախումբին ձայնը միշտ լսելի պիտի մնայ, անոր հնչիւնները պիտի շարունակեն արձագանգել:
Եղբ. Նազարէթ Սապունճեան կը հաւատար, որ նոյնիսկ ամէնէն փոքր քայլերը կրնան հիմք դառնալ մեծ գործերու: Տարիներ շարունակ ան չխնայեց ժամանակ, ուժ, ո՛չ ալ՝ անձնական հանգիստ: Եղաւ ո՛չ միայն անդամ, այլեւ հիմնասիւն մը` սիրտով ծառայող, հոգիով առաջնորդող:
Ան եղաւ բազում սերունդներու խրատիչը` իր խաղաղ, բայց հաստատակամ բնաւորութեամբ, իր ժպիտով ու սրտբաց զրոյցներով, միշտ պատրաստ` լսելու եւ օգնելու:
Այո, եղբա՛յր, դուն յաւէտ բաժնուեցար մեզմէ: Քու բացակայութիւնդ ծանր է, սակայն ներկայութիւնդ անմահ է մեր յիշողութեան մէջ: Քու ձգած ժառանգութիւնդ կը մնայ իբրեւ ջահ` մեզ առաջնորդող:
Դուն եղար այն երէց եղբայրը, որուն աչքերուն մէջ տեսանք փորձառութիւն, բայց նաեւ՝ հաւատք, քաջութիւն եւ անսահման սէր հայ մարդու, հայ ընտանիքի եւ անշո՛ւշտ, մեր սիրելի Հ.Մ.Ը.Մ.ին:
Դուն ապրեցար Հ.Մ.Ը.Մ.ական հարուստ կեանք մը` հաւատարիմ մնալով միութեան նշանաբանին` «Բարձրացի՛ր-բարձրացուր»ին: Քու ազնիւ եւ Հ.Մ.Ը.Մ.ական տիպարովդ եղար օրինակ բոլոր անոնց, որոնք ճանչցան քեզ:
Հ.Մ.Ը.Մ.ի Անթիլիասի մասնաճիւղը իր 55-ամեայ պատմութեան ընթացքին ունեցած է պատկառելի ղեկավարներու փաղանգ մը, սակայն հազուագիւտ եղած են եղբօր նման ազնիւ եւ նուիրեալ դէմքերը:
Վստահ եղիր, սիրելի՛ եղբայր, որ Հ.Մ.Ը.Մ.ի ընտանիքը ընդհանրապէս եւ Հ.Մ.Ը.Մ.ի Անթիլիասի մասնաճիւղը մասնաւորապէս, միշտ պիտի յիշեն քեզ: Թող Հ.Մ.Ը.Մ.ի դրօշը միշտ ծածանի քու անմոռանալի ժպիտիդ ներքեւ:
Վարձքդ կատար, սիրելի՛ եղբայր:
Յարգա՜նք վաստակիդ ու երթդ բարի:
Թող հողը թեթեւ գայ վրադ: