Հ.Մ.Ը.Մ.Ը ԿԸ ՎԵՐԱԿԵՆԴԱՆԱՆԱՅ ՀԱՍԻՉԷԻ ՄԷՋ
Հասիչէի մատղաշ սերունդը Հ.Մ.Ը.Մ.ի դրօշին տակ համախմբելու նպատակով, Հ.Մ.Ը.Մ.ի Սուրիոյ Շրջանային Վարչութիւնը նախաձեռնեց նոր միաւորի մը յառաջացման։
Արդ, անցնող ամիսներուն, Շրջանային Վարչութեան անդամ քոյր Անի Սարգիս եւ Գամիշլիի մասնաճիւղի վարչութիւնը յաջորդական այցելութիւններ կատարեցին Հասիչէ, ուր համագործակցաբար ծրագրեցին տեղւոյն միաւորի կազմութեան աշխատանքները եւ յառաջացուցին ենթայանձնախումբ մը, բաղկացած հետեւեալ քոյր-եղբայրներէն- քոյր Ալին Սարգիսեան, եղբ. Յովսէփ Յովսէփեան, եղբ. Սեւակ Աւագեան, եղբ. Տաճատ Քէշիշեան, եղբ. Աւօ Ներսէսեան, եղբ. Քրիստ Մելքոնեան, եղբ. Կարէն Սարգիսեան, քոյր Մակի Փանոսեան, քոյր Գաթիա Ղազարեան, քոյր Աննա Մարտօ եւ քոյր Ռուպա Գոչեան։
Եւ ահա, 27 Ապրիլ 2025-ին, Հ.Մ.Ը.Մ.ի Սուրիոյ Շրջանային Վարչութիւնը պաշտօնական այցելութեամբ մը ժամանեց Հասիչէ։
Գամիշլիի մասնաճիւղի ատենապետ եղբ. Անդրանիկ Սարգիսեան միաւորի կազմութեան նախապատրաստական աշխատանքներուն մասին ամփոփ զեկուցում մը տալէ ետք, հրաւիրեց Շրջանային Վարչութեան ատենապետ եղբ. Յարութ Օգճեանը, վարչութեան անդամներ` եղբ. Աբիկ Խաչոյեանն ու քոյր Անի Սարգիսը հովանաւորելու դրօշակի փոխանցման արարողութիւնը։
Քոյր Անի Սարգիս ընթերցեց Հ.Մ.Ը.Մ.ի Սուրիոյ Շրջանային Վարչութեան խօսքը, ապա բեմ հրաւիրեց Արշակ Ա. քհնյ. Ալաճաճեանը՝ կատարելու համար դրօշի օրհնութիւնը։
Եղբ. Յարութ Օգճեան Հ.Մ.Ը.Մ.ի դրօշը յանձնեց քոյր Ալին Սարգիսեանին, ապա քահանայ հայրը օրհնեց ներկաները եւ յաջողութիւն մաղթեց Հասիչէի նորակազմ միաւորին։
Նշենք, որ Հասիչէի մէջ Հ.Մ.Ը.Մ.ը առաջին անգամ հիմնուած է 1939-ին եւ գործած է սկաուտական ու մարզական զոյգ ճիւղերով, ապա քաղաքական աննպաստ պայմաններու բերումով դադրած է 1961-ին։
