Հ.Մ.Ը.Մ.Ի ԹՈՐՈԹՈՅԻ ՄԱՍՆԱՃԻՒՂԸ ՕԺՏՈՒԵՑԱՒ 10 «ՎԿԱՅԵԱԼ»ՆԵՐՈՎ
Փոքր տարիքէն երեխաներ կը վայելեն գայլիկական շարքերու բերկրանքն ու խանդավառութիւնը։
Գայլիկը տարուէ-տարի հասակ առնելով կը դառնայ խոստմնալից սկաուտ, որ օժտուած կ’ըլլայ սկաուտական գիտելիքներով, ազգային գաղափարներով եւ հայրենասիրական նկարագիրով։ Գիտելիքներու կողքին, սկաուտը կը վայելէ սկաուտական կարգերու եւ աստիճաններու պատասխանատութիւնը։ Ան բարձրագոյն կարգին` «Վկայեալ»ին հասնելով, կ’իւրացնէ Շրջանային Խմբապետութեան կողմէ ծրագրուած դասընթացքները, կը ստանայ սկաուտական գործնական գիտելիքներ ու լիակատար գիտելիքներով կը վկայուի «Վկայեալ» կարգով։
Արդարեւ, Շաբաթ, 3 Մայիս 2025-ի յետմիջօրէին ժամը 6-ին, Թորոնթոյի «Հայ Կեդրոն»ին մէջ ընթացք առաւ Հ.Մ.Ը.Մ.ի Գանատայի շրջանի «Վկայեալ» կարգի հանդիսութիւնը։ Ձեռնարկը կը վայելէր ներկայութիւնը Հ.Մ.Ը.Մ.ի Կեդրոնական Վարչութեան անդամ քոյր Լիոնի Սարմազեանի, Կեդրոնական Կոմիտէի եւ Շրջանային Վարչութեան ներկայացուցիչներու, Շրջանային Սկաուտ. Խորհուրդի ատենապետի եւ անդամներու, Շրջանային Ընդհ. Խմբապետի, Շրջանային Խմբապետութեան, անցեալին ծառայած խմբապետներու, համակիրներու եւ ծնողներու։
Գանատայի, Հայաստանի եւ Արցախի քայլերգներուն Հ.Մ.Ը.Մ.ի շեփորախումբին կատարողութեամբ, տարազաւորներու տողանցքով եւ Շրջանային Ընդհ. Խմբապետի «Պատուի ա՛ռ»ի հրահանգով, սկիզբ առաւ «Վկայեալ» կարգի հանդիսութիւնը։
Օրուան հանդիսավարներ` քոյրեր Լոռի Պէրպէրեան եւ Անի Աստուրեան ներկաները հրաւիրեցին մէկ վայրկեան յոտնկայս լռութեամբ յարգելու յիշատակը մեզմէ առյաւէտ հեռացած Հ.Մ.Ը.Մ.ականներուն։
Շրջանային Սկաուտ. Խորհուրդի անդամներէն եղբ. Արմէն Պալիոզեան հանդէս եկաւ բացման խօսքով։ Ան ըսաւ. «Հ.Մ.Ը.Մ.ի նպատակներէն են` ծառայել ժողովուրդին, պատրաստել ամուր նկարագիրով հայ մարդը»։ Եղբայր Արմէն անդրադարձաւ «Վկայեալ» կարգի թեկնածուներուն ստացած ազգային, սկաուտական, քաղաքացիական, հոգեբանական եւ կրօնական գիտելիքներուն։ Այս գիտելիքները ստանալէ ետք, իւրաքանչիւր թեկնածու պատրաստեց թէզ եւ ներկայացուց խումբին։ Եղբայրը իր խօսքին աւարտին ըսաւ. «Այսօր ունինք 10 թեկնածուներ, որոնք Շրջանային Սկաուտ. Խորհուրդին կողմէ պիտի ստանան «Վկայեալ» կարգ։ Կը շնորհաւորենք ձեզ, քաջ գիտակցելով որ Հ.Մ.Ը.Մ.ի ջահ վառ պիտի պահէք եւ պիտի դաստիարակէք սերունդներ՝ միշտ կառչած մնալով Հ.Մ.Ը.Մ.ի նշանաբանին «Բարձրացի՛ր-բարձրացուր»ին։
Հանճարեղ Պարոյր Սեւակի «Ապրել» բանաստեղծութեամբ հանդէս եկաւ քոյր Լոռի Պէրպէրեան, իսկ հայկական պարով` քոյր Անոյշ Յարութիւնեան։
Հ.Մ.Ը.Մ.ի Գանատայի Շրջանային Վարչութեան խօսքը փոխանցեց եղբ. Անդօ Պոյաճեան։ Ան ըսաւ. «Մեծ հրճուանքով կը կատարենք այս եզակի տօնախմբութիւնը, ուր Գանատայէն 40 թեկնածուներ կ’արժանանան «Վկայեալ» կարգի։ Անոնցմէ տասն կը վկայուին այսօր»։ Եղբայրը իր խօսքին մէջ գնահատեց թեկնածուները, որոնք լրջօրէն եւ ամենայն բծախնդրութեամբ հետեւեցան «Վկայեալ» կարգի գործնական եւ տեսական դասընթացքներուն, ինչ որ յաւելեալ թափ տուաւ զարգացնելու իրենց գիտելիքները եւ պատրաստելու ապագայի փորձառու եւ գիտակից ղեկավարներ»։
Եղբ. Անդօ պատմական հակիրճ ակնարկով մը ներկայացուց Հ.Մ.Ը.Մ.ի ծառայութեան եւ նուիրումի աշխատանքները, իբրեւ հայ ժողովուրդին յոյս եւ ազգային խանդավառութիւն ներշնչող միութիւն։ Երկարամեայ պատմութիւն ունեցող այս միութիւնը ունեցաւ լայնածաւալ եւ աշխարհացրիւ գործունէութիւն՝ հասնելով մինչեւ Գանատա։ Եղբայրը նշեց Գանատայի մէջ գործող աւելի քան 2000 Հ.Մ.Ը.Մ.ականները, որոնց կէսը կը կազմեն սկաուտներ։ Անոնք աշխոյժ գործունէութեամբ, սեմինարներով, համահայկական, համագաղութային եւ միջ-մասնաճիւղային բանակումներով կը պստրաստուին դառնալ հայրենասիրական ու ազգային գաղափարներով տոգորուած ապագայ խոստմնալից պատասխանատուներ, հաստատեց ան։
Աւարտին, եղբ. Անդօ շնորհակալական եւ երախտագիտական խօսք ուղղեց Շրջանային Սկաուտ. Խորհուրդին եւ Խմբապետութեան, ինչպէս նաեւ մասնաճիւղերու Սկաուտ. Խորհուրդներուն եւ խմբապետութիւններուն, որոնք ժրաջան, կամաւոր ու հետեւողական աշխատանքով աշխոյժ կը պահեն Հ.Մ.Ը.Մ.ը։
Հանդիսութեան ընթացքին եղբ. Կարօ Ճըրճիի, քոյր Կասիա Կարապետեան-Կիւլեանի եւ Փէկի Աւընեան-Պապօղլեանի կողմէ պատրաստուած «Վկայեալ» կարգի դասընթացքին գործնական եւ տեսական աշխատանքներուն տեսերիզը ցուցադրուեցաւ ներկաներուն, որոնք դիտեցին զայն գոհունակութեամբ։
Եղբ. Վարանդ Պետրոսեանի «Գետաշէն» երգին ներկայացումը սաքսոֆոնի ընկերակցութեամբ շատ տպաւորիչ էր։
«Եղբ. Պօղոսին ուղեւորութիւնը» թատերական շուքերով ներկայացումը գոհունակ եւ հաճելի արտայայտութիւն ստեղծեց ներկաներուն մօտ։ Ապա, եղբ. Պետիկ Տաւուտեան մեներգեց «Երազ իմ երկիր հայրենի» եւ «Կեանքս հայրենիքի» երգերը։
Շրջանային Խմբապետներ` եղբ. Րաֆֆի Դաւիթեան եւ քոյր Կասիա Կարապետեան-Կիւլեան ամփոփ տեղեկագրութեամբ մը ներկայացուցին «Վկայեալ» կարգի պատրաստութեան աշխատանքները եւ շնորհակալութիւն յայտնեցին թեկնածուներուն, որոնք անվերապահօրէն մասնակցեցան, ունկնդրեցին, հայերէն լեզուով թէզեր պատրաստեցին եւ իրենց մասնաճիւղին ներկայացուցին։
Այնուհետեւ, Շրջանային Խմբապետութեան եւ Սկաուտ. Խորհուրդի ատենապետին ձեռամբ, 10 թեկնածուներ ստացան «Վկայեալ» կարգի իրենց վկայականները։
Աւարտին, Հ.Մ.Ը.Մ.ի Գանատայի Շրջանային Ընդհ. Խմբապետ եղբ. Արուշ Պէրպէրեան ներկայացուց իր խօսքը նշելով. «Դուք այսօր արժանացաք «Վկայեալ» կարգի վկայականին, որովհետեւ մեծ զոհողութեամբ եւ նուիրումով հետեւեցաք այս կարգի դասընթացքներուն, ձեր անկարելին կարելի դարձնելով՝ ամէն աշխատանք ի սպաս դրիք արժանանալու անոր»։ Եղբ. Արուշ շեշտը դրաւ վկայականի ապագայ աշխատանքին վրայ եւ իր խօսքը վկայուողներուն ուղղելով ըսաւ. «Դուք այսօր վկայուեցէք սկաուտական ամէնէն բարձր կարգով եւ այսօրուընէ ձեր աշխատանքը կրկնապատկուեցաւ։ Հ.Մ.Ը.Մ.ը ձեզմէ շատ ակնկալութիւններ ունի։ Ես վստահ եմ, որ դուք արժանաւոր ժառանգորդները պիտի ըլլաք ձեզի կանխած սերունդներուն եւ լաւագոյն ձեւով պիտի կատարէք ձեզի վստահուած պարտականութիւնը։ Դաշտը ձերն է եւ աշխատանքը՝ ձեզի։ Գործեցէք եւ ծառայեցէք միշտ հետեւելով Հ.Մ.Ը.Մ.ի նշանաբանին՝ «Բարձրացի՛ր-բարձրացուր»ին»։
Հանդիսութիւնը փակուեցաւ շեփորախումբի «Ով հայ արի» քայլերգին կատարումով։
Վկայուողները եւ պատասխանատուները հատեցին օրուան կարկանդակը եւ ջերմագին խօսքերով ցտեսութիւն մաղթեցին իրարու։