Հ.Մ.Ը.Մ.Ի ԼԱՒԱԼԻ ՄԱՍՆԱՃԻՒՂԻ ՍԿԱՈՒՏԱԿԱՆ ՀԱՆԴԷՍԸ
Սկաուտական աշխատանքները, արարողութիւնները եւ գործունէութիւնները ժողովուրդին աւելի ծանօթացնելու նպատակով, մասնաճիւղերու Սկաուտ. Խորհուրդները եւ խմբապետութիւնները կը կազմակերպեն մտերմիկ հաւաքներ, սկաուտական եւ ծնողական հանդէսներ։
Այսպէս, Հ.Մ.Ը.Մ.ի Լաւալի մասնաճիւղի Սկաուտ. Խորհուրդն ու խմբապետութիւնը, Շաբաթ, 3 Մայիս 2025-ին կազմակերպեցին ծնողական հանդէս մը, որուն գլխաւոր նպատակն էր գեղարուեստական կոկիկ յայտագիր մը հրամցնել ներկաներուն եւ կատարել սկաուտական աստիճանատուչութիւն եւ վկայականաց բաշխում։
Հանդիսութիւնը կը վայելէր ներկայութիւնը Հ.Մ.Ը.Մ.ի Գանատայի Շրջանային Վարչութեան ատենապետ եղբ. Մանօ Քէօսէեանի, Շրջանային Վարչութեան անդամ եղբայրներ Ասատուր Երեմեանի եւ Լեւոն Իսկէնտէրեանի, Շրջանային Սկաուտ. Խորհուրդի անդամ քոյր Անի Երեմեանի եւ ուղեկից միութիւններու ներկայացուցիչներու, ծնողներու եւ համակիրներու։
Թմբուկի եւ շեփորի «Յառաջ նահատակ» քայլերգի նուագով սկիզբ առաւ ծնողական հանդէսը, որուն յաջորդեց Լաւալի մասնաճիւղի Սկաուտ. Խորհուրդի ատենապետուհի քոյր Զապէլ Թորոսեանի բացման խօսքը։ Քոյրը ըսաւ. «Հ.Մ.Ը.Մ.ը ազգային միութիւն է, ուր երիտասարդը եւ պատանին կը դաստիարակուին կառչած մնալ հայութեան եւ հայրենիքին»։ Ատենապետուհին շնորհաւորեց հանդիսութեան ներկայ մայրերուն տօնը եւ հաստատեց. «Հայերու համար մայրը միշտ սուրբ եղած է, որովհետեւ հայրենիքը կը կոչենք մայր Հայաստան, եկեղեցին կը կոչենք մայր տաճար, լեզուն՝ մայրենի լեզու, պետականութեան կեդրոն քաղաքը՝ մայրաքաղաք։ Հայուն համար մայրը կը խորհրդանշէ սրբութիւն, հայրենասիրութիւն, զօրութիւն, գութ եւ սէր»: Ան անդրադարձաւ նաեւ Հայաստանի անկախութեան 107-ամեակին, ա՛յն անկախութեան, որ իրականացաւ հայ ժողովուրդի զաւակներու հայրենասիրութեամբ եւ զոհաբերութեամբ, Հայ Յեղափոխական Դաշնակցութեան նուիրեալ ղեկավարներուն եւ հայկական բանակի վճռական կեցուածքին շնորհիւ»:
Հանդիսավար քոյր Նուշիկ Չալօղլեանի հմուտ ներկայացումով, յայտագիրը պահեց իր յաջորդականութիւնը։
Երգչախումբին սկաուտական, ազգային երգերու եւ կանչերու ներկայացումը, ինչպէս նաեւ քոյրեր Մարիա Ճըրճիի եւ Մարլա Տունկեանի զուգերգի ընկերակցութիւնը բարձր տրամադրութիւն եւ խանդավառութիւն ստեղծեց ներկաներուն մօտ։
Նարնջագոյն վոհմակի մայրերու նուիրրուած պարը, արենոյշներու եւ աստիճանաւորական կազմի հայկական պարերու կատարումը հաճելի բերկրանք ընծայեց ներկաներուն։
Հ.Մ.Ը.Մ.ի Լաւալի մասնաճիւղի վարչութեան սրտի խօսքը փոխանցեց ատենապետ եղբ. Յովիկ Համալեան։ Ատենապետը ողջոյնի խօսքէն ետք ըսաւ. «Կը խոստանանք, որ մեր շարքերը աւելի խտանան, հաւատքը աւելի զօրանայ, մեր ոտքերուն քայլը աւելի բարձրանայ եւ մեր յաղթանակի ձայները աւելի բարձրանան, որովհետեւ մենք կտակ ունինք կատարելիք եւ ժառանգորդներն ենք հիմնադիր սերունդին»։ Ատենապետը իր խօսքին աւարտին երախտագիտութիւն յայտնեց բոլորին՝ իրենց բարոյական աջակցութեան համար եւ խօսքը աւարտեց շնորհակալութիւն յայտնելով ծնողներուն, որոնք իրենց զաւակները վստահած են Հ.Մ.Ը.Մ.ի մեծ ընտանիքին։
Ապա, Անդրանիկ Ծառուկեանի «Ուխտ Արարատին» ասմունքեցին քոյր Արշի Մարի, եղբայրներ Կարէն Գափլանեան եւ Արէն Շաքարեան։ Մօր մասին բանաստեղծութիւններու համադրումը ներկայացուցին քոյրեր Ալին Տանելեան, Էլիանա Տանելեանի, Սթեֆանի Բալուլեան եւ Գարլա Փալանճեան։ Անոնք ներկայացուցին նաեւ Հ.Մ.Ը.Մ.ի նուիրուած քառեակներ։
Քոյրեր Մարիթա Սարգիսեան, Գարին Սանոսեան եւ եղբ. Յակոբ Արուշեան յուզումնախառն եւ տպաւորիչ պահեր ապրեցուցին ներկաներուն մօտ։ Կարմիր վոհմակի գաւազանով մարզանքի ճշգրիտ եւ համահաւասար շարժումները խանդավառ մթնոլորտ ստեղծեցին հանդիսատեսներուն մօտ։ Հաճելի էր ունկնդրութիւնը «Մշոյ աղջիկ» եւ «Մշոյ Գորանի» ժողովրդական երգերուն կիթառով կատարումը եղբ. Կարէն Նաճարեանի կողմէ։ Իսկ բուրգի չարքաշ, ծնրադիր ձեւերը եւ հանդիսատեսին գնահատական արտայայտութիւնները թափ ու եռանդ տուին կատարողներուն։
Հանդէսի աւարտին տեղի ունեցաւ աստիճանատուչութիւն եւ վկայականաց բաշխում՝ «Կակուղ թաթիկ»ի, «Միաստղ»ի, «Երկաստղ»ի, Փոխ Առաջնորդի, Առաջնորդի եւ Ա. կարգի թեկնածումներու։
Հանդէսը փակուեցաւ «Ով հայ Արի» սկաուտական քայլերգով, որմէ ետք ներկաները հիւրասիրուեցան համադամ ուտելիքներով։
