Հ.Մ.Ը.Մ.Ի ՀԱԼԷՊԻ ՄԱՍՆԱՃԻՒՂԸ ՆՇԵՑ «ՀԱՅ ՍԿԱՈՒՏԻ ՕՐ»Ը

Հ.Մ.Ը.Մ.Ի ՀԱԼԷՊԻ ՄԱՍՆԱՃԻՒՂԸ ՆՇԵՑ «ՀԱՅ ՍԿԱՈՒՏԻ ՕՐ»Ը

Վարդանանց սերունդի դիւցազնական ոգիով, ամէն տարի, Հ.Մ.Ը.Մ.ի սկաուտները կը նշեն «Հայ Սկաուտի օը»ը։

Հովանաւորութեամբ Հ.Մ.Ը.Մ.ի Հալէպի մասնաճիւղի Սկաուտ. Խորհուրդին, ներկայութեամբ մասնաճիւղի վարչութեան եւ Հ.Մ.Ը.Մ.ի Սուրիոյ Շրջանային Սկաուտ. Խորհուրդին եւ խմբապետութեան, Կիրակի, 30 Մարտ 2025-ին, «Թեր Սանթ» վանքին մէջ տեղի ունեցաւ «Հայ սկաուտի օր»ուան տօնակատարութիւն, մասնակցութեամբ՝ 142 քոյր-եղբայրներու։

Գործունէութիւնը սկիզբ առաւ «Յառաջ նահատակ» քայլերգով։  Մասնակիցները բաժնուեցան Հ.Մ.Ը.Մ.ի հիմնադիր եղբայրներու անունները կրող եօթը խմբակներու։ Յայտագիրը ընդգրկեց նախաճաշ, չափական մարզանք, ռալի, ձեռային աշխատանք (փողկապիկ) եւ դասախօսութիւն։ Դասախօսն էր Հ.Մ.Ը.Մ.ի Սուրիոյ Շրջանային Խմբապետուհի քոյր Թամար Աւետեան-Գատեհճեան, նիւթ ունենալով «Հ.Մ.Ը.Մ.ի Հալէպի մասնաճիւղին պատմութիւնը»։

Ճաշէն ետք, քոյրերն ու եղբայրները տողանցեցին, մասնակցութեամբ Հ.Մ.Ը.Մ.ի Հալէպի մասնաճիւղի շեփորախումբին։

Մասնաճիւղի խմբապետ եղբ. Յակոբ Ուրիշիկեան գնահատեց ռալիի մրցումին առաջին հանդիսացած խումբը, անդամներէն իւրաքանչիւրին նուիրելով իր ձեռքով աշխատցուած փողկապիկ մը։

Աւարտին, ներկաները Սուրիոյ Շրջանային Սկաուտ. Խորհուրդին կողմէ ստացան յուշանուէրներ։ Գործունէութիւնը փակուեցաւ «Յառաջ նահատակ» քայլերգով։