Հ.Մ.Ը.Մ.Ի ՀԱԼԷՊԻ ՄԱՍՆԱՃԻՒՂԻ 100-ԱՄԵԱԿԻ ՓԱՌԱՏՕՆԸ
Կամքի, հաւատքի եւ զոհողութեան երեք սիւներու վրայ հաստատուած Հ.Մ.Ը.Մ.ի Հալէպի մասնաճիւղը բոլորած է իր 100-ամեակը՝ կերտելով առողջ մարմինով եւ արթուն միտքով սերունդներ:
Արդարեւ, նախագահութեամբ Բերիոյ Հայոց Թեմի Առաջնորդ Մակար Արք. Աշգարեանի, հովանաւորութեամբ Հ.Մ.Ը.Մ.ի Սուրիոյ Շրջանային Վարչութեան եւ կազմակերպութեամբ Հ.Մ.Ը.Մ.ի Հալէպի մասնաճիւղի Վարչութեան, Կիրակի, 11 Մայիս 2025-ին, Հ.Մ.Ը.Մ.ի մարզահամալիրին մէջ տեղի ունեցաւ Հալէպի մասնաճիւղի հիմնադրութեան100-ամեակի փառատօնը՝ ներկայութեամբ սրբազան հօր, հոգեւոր հայրերու, պատկան մարմինին, Ազգային Վարչութեան, Հ.Մ.Ը.Մ.ի Կեդրոնական Վարչութեան ներկայացուցիչին, Սուրիոյ Շրջանային Վարչութեան եւ Շրջանային Սկաուտ. Խորհուրդին, քոյր միութիւններու ներկայացուցիչներու եւ ծնողներու:
ԲԱՑՈՒՄԸ
Փառատօնին բացումը կատարուեցաւ «Յառաջ նահատակ» քայլերգով, ապա հանդիսավար քոյր Գարօլին Քիւրքլեան-Առոյեան ներկաները հրաւիրեց մէկ վայրկեան յոտնկայս յարգելու մեզմէ յաւէտ բաժնուած Հ.Մ.Ը.Մ.ականներուն յիշատակը։
ՎԱՐՉՈՒԹԵԱՆ ԽՕՍՔԸ
Վարչութեան խօսքը արտասանեց Հ.Մ.Ը.Մ.ի Հալէպի մասնաճիւղի ատենապետ եղբ. Արամ Աւետիսեան։ Ան դիտել տուաւ, որ 100 տարիներու ընթացքին Հ.Մ.Ը.Մ.ի մարզական եւ սկաուտական շարքերուն միացած են հազարաւոր հալէպահայեր: Հ.Մ.Ը.Մ.ի Հալէպի մասնաճիւղը 100 տարեկան է, բայց երիտասարդ է, որովհետեւ ինքզինք կը նորոգէ: Ապա, ան երախտագիտական խօսքեր ուղղեց Բերիոյ Հայոց Թեմի Առաջնորդին, Ազգային Վարչութեան, Հ.Մ.Ը.Մ.ի Կեդրոնական եւ Սուրիոյ Շրջանային Վարչութիւններուն, Շրջանային Սկաուտ. Խորհուրդին, ՍՕԽ-ին, Համազգայինին, ինչպէս նաեւ փառատօնը կազմակերպող կեդրոնական յանձնախումբին: Ան շնորհակալութիւն յայտնեց նաեւ Հ.Յ.Դ.ին, որուն հովանաւորութեամբ գործող Հ.Մ.Ը.Մ.ը ամէնէն դժուար պայմաններու մէջ նոյնիսկ գոյատեւեց եւ շարունակեց իր ազգային առաքելութիւնը:
ՋԱՀԱՎԱՌՈՒԹԻՒՆԸ
Փառատօնը սկսաւ մասնաճիւղի գայլիկ-արծուիկ, արի-արենոյշ եւ երէց-պարման միաւորներէն խումբ մը քոյրերու եւ եղբայրներու բացման պատկերով, մասնաճիւղի շեփորախումբին նուագով։
Այնուհետեւ Հ.Մ.Ը.Մ.ի Հալէպի 100-ամեայ ջահը փոխանցուեցաւ 91-ամեայ եղբ. Կարպիս Պետիրեանին, որ իր կարգին զայն փոխանցեց երիտասարդ սերունդին, որպէսզի ան միութեան առաքելութիւնը շարունակէ պատասխանատուութեան բարձր գիտակցութեամբ։ Ապա, եղբ. Յակոբ Ուրիշիկեանի փոխանցած ջահով 100-ամեակի կրակը բոցավառեցաւ եւ երկու կրտսեր Հ.Մ.Ը.Մ.ականներ կատարեցին 100-ամեակի նշանակին բացումը:
ԳԵՂԱՐՈՒԵՍՏԱԿԱՆ ՅԱՅՏԱԳԻՐԸ
Համազգայինի «Ն. Աղբալեան» մասնաճիւղի «Շուշի» մանկապատանեկան պարախումբը հանդէս եկաւ «Կիւմրիի պար»ով, որմէ ետք ելոյթ ունեցաւ մասնաճիւղին շեփորախումբը։
Փառատօնին մթնոլորտը ճոխացուց Յովիկ Պարսումեան, մեներգելով «Օ՛ն յառաջ, Հ.Մ.Ը.Մ» երգը։
Սկաուտական շարքերու յատուկ կարգապահական վարժութիւններ ներկայացուցին մասնաճիւղին աստիճանաւորական եւ խմբապետական կազմերը։ Ապա, Յովիկ Պարսումեան «Հ.Մ.Ը.Մ. պանծալի» երգով խանդավառեց հանդիսականները։
Տողանցեցին մասնաճիւղին սկաուտական եւ մարզական խումբերը։
Հ.Մ.Ը.Մ.ի Սուրիոյ Շրջանային խմբապետ եղբ. Ռաֆֆի Կարապետեան եւ խմբապետուհի քոյր Թամար Գատեհճեան դիմաւորեցին տողանցողները։ Այսպէս, յաջորդաբար, հպարտ քայլերով ներկաներուն առջեւէն անցան մասնաճիւղին «Յովհաննէս Հինդլեան» երէց-պարման միաւորը, «Շաւարշ Քրիսեան» արի-արենոյշ միաւորը, «Գրիգոր Յակոբեան» գայլիկ-արծուիկ միաւորը, պասքեթպոլի խումբերը եւ ֆութպոլի խումբը:
ԵԶՐԱՓԱԿԻՉ ՊԱՏԳԱՄԸ
Փառատօնին եզրափակիչ պատգամը ուղղեց Բերիոյ Հայոց Թեմի Առաջնորդ Մակար Արք. Աշգարեան:
Առաջնորդը ըսաւ, որ նոր սերունդի զաւակները այսօր իրենց ներկայութեամբ եկան վկայելու, որ հայու հոգին միշտ յաղթական է, կենսունակ է եւ երբե՛ք նահանջ չի ճանչնար, ինչ ալ ըլլան կեանքի պայմաններն ու մարտահրաւէրները։
«Հ.Մ.Ը.Մ.ի նշանաբանը՝ «Բարձրացի՛ր-բարձրացուր»ը Աստուածաշնչական հիմք ունի։ Եթէ մարդ Աստուածային ներգործող շունչը իր մէջ չունենայ, չի կրնար իր կեանքը զոհել ուրիշը բարձրացնելու համար։ Հ.Մ.Ը.Մ.ի նշանաբանը ո՛չ միայն բարձրացի՛ր է, այլեւ՝ բարձրացո՛ւր։ Կը բարձրանաս եւ քոյրդ, եղբայրդ ու նմանդ կը բարձրացնես», ըսաւ սրբազան հայրը։ Ապա ան շնորհաւորեց Հ.Մ.Ը.Մ.ականները եւ ժողովուրդը հրաւիրեց ծափողջոյններով քաջալերելու զանոնք։
Փառատօնը փակուեցաւ «Յառաջ նահատակ» քայլերգով եւ «Պահպանիչ»ով։
