Հ.Մ.Ը.Մ.Ի ՀԱԼԷՊԻ ՖՈՒԹՊՈԼԻ ԵՐԲԵՄՆԻ ԱՍՏՂԵՐԷՆ ՄԷԿՆ ԱԼ ՄԱՐԵՑԱՒ

Հ.Մ.Ը.Մ.Ի ՀԱԼԷՊԻ ՖՈՒԹՊՈԼԻ ԵՐԲԵՄՆԻ ԱՍՏՂԵՐԷՆ ՄԷԿՆ ԱԼ ՄԱՐԵՑԱՒ

Ճորճիկ Ռաստկէլէնեան
ԼՈՍ ԱՆՃԵԼԸՍ
 
Վաստակաշատ, հաւատաւոր, ծառայասէր, համեստ, կարգապահ եւ Հ.Մ.Ը.Մ.ի մարդկային ու ազգային սկզբունքներուն հանդէպ կուռ հաւատք, վեհ եւ ազնիւ համոզում ու գիտակցութիւն ունեցող, Հ.Մ.Ը.Մ.ի Հալէպի ֆութպոլի երկարամեայ աստղ, անսակարկ նուիրեալ եւ բոլորին սիրելի եղբօր՝ Սուրէն Երէցեանի մահուան գոյժը խոր ցաւ եւ անսահման վիշտ պատճառեց հոգիիս եւ էութեանս:

Անդարձ մեկնած եղբ. Սուրէն երէցեան, որ մահկանացուն կնքեց Գանատայի մէջ, միութենական եւ մարզական բոլոր տեսակի պարտականութիւններն ու պարտաւորութիւնները կատարած է բարձր եւ ազնիւ գիտակցութեամբ, խոր հաւատքով, լուռ ու մունջ, եւ ամենայն կարգապահութեամբ։ Իր օգտակար ծառայութեամբ եւ շինիչ մասնակցութեամբ ան մեծապէս նպաստած է Հ.Մ.Ը.Մ.ի վերելքին եւ պանծալի նուաճումներուն:

Եղբ. Սուրէն երկար տարիներ եղած է Հ.Մ.Ը.Մ.ի Հալէպի ֆութպոլի խումբին մնայուն աստղ մարզիկը եւ իր դրական եւ օգտաշատ ներդրումը ունեցած է Հ.Մ.Ը.Մ.ի Հալէպի շքեղ պատմութեան մէջ, որ ոսկի տառերով արձանագրած է այս բոլոր անմոռանալի բացառիկ իրագործումներն ու յաղթանակները, ի մասնաւորի երկու շատ կարեւոր անզուգական ախոյեանութիւնները, որոնց տիրացման մէջ եղբ. Սուրէնը ունեցած է իր կարեւոր դերակատարութիւնը. 1961-1962 տարեշրջանի Սուրիոյ նախագահական առաջին բաժակը եւ 1964-1965 տարեշրջանի Սուրիոյ մումթազ դասակարգի առաջին ախոյեանութիւնը:

իբրեւ տիպար աստղ, բարոյականի տէր մարզիկ, ան միշտ արժանացած է իր խումբի եղբայրներուն, համակիրներուն եւ Հ.Մ.Ը.Մ.ի համայն ընտանիքին ջերմ սիրոյն, խոր յարգանքին եւ բարձր գնահատանքին ու արժեւորումին:

Վարձքդ կատա՛ր, անձնուրաց, անբասիր, հաւատաւոր, անսակարկ նուիրեալ Հ.Մ.Ը.Մ.ական եղբ. Սուրէն Երէցեան:

Ճիշդ է, որ դուն ֆիզիքապէս մեզմէ հեռու պիտի մնաս, սակայն դուն մեր հոգիներուն, միտքերուն, յիշատակներուն մէջ մնայուն եւ բացառիկ տեղ պիտի գրաւես, եւ ապրիս յաւէտ:
Կը խնդրեմ մեր Տիրոջ Աստուծմէ, որ քեզի երկինքի արքայութեան արժանացնէ եւ հոն քու ֆութպոլի խումբի ախոյեան 10 խաղընկերներուդ միանալով, միասին խաղաղ ու հանգիստ ապրիք եւ ննջէք:

Վարձքդ կատար, աննման, հաւատաւոր եւ հարազատ եղբ. Սուրէն Երէցեան, փոխան խունկի, մոմի եւ գեղեցկագոյն ծաղկեփունջի, այս անկեղծ, սրտաբուխ եղբայրական խօսքերը կը ներկայացնեմ, իբրեւ բարձր գնահատանքի եւ եղբայրական ջերմ սիրոյ արտայայտութիւն:

Միշտ պիտի յիշենք քու ուրախ դէմքդ, քաղցր ժպիտդ ու քաղցրահամ խօսքերդ: