Հ.Մ.Ը.Մ.Ի ՆԱՒԱՊՏՈՅՏԸ
Յառաջիկայ տարի, Յուլիս 2026-ին, Հ.Մ.Ը.Մ. կը կատարէ իր առաջին նաւապտոյտը՝ Եւրոպայի սրտին, Տանուբ գետին վրայ։ Նաւապտոյտը 13 Յուլիս 2026-ին կը սկսի Վիլշոֆէնէն, Գերմանիա, եւ կ’աւարտի 20 Յուլիս 2026-ին, Պուտափեշտ, Հունգարիա։
Եօթը օրուան ընթացքին նաւապտոյտի մասնակիցները կ’այցելեն Գերմանիոյ, Աւստրիոյ, Սլովաքիոյ եւ Հունգարիոյ եօթը քաղաքներ, ուր կը ծանօթանան պատմական-տեսարժան վայրերու եւ հայութեան հետ առնչութիւն ունեցող յուշարձան-կոթողներու։
Նաւապտոյտի կազմակերպման համար յառաջացած է յատուկ յանձնախումբ եւ ստեղծուած է կայքէջ՝ cruise.homenetmen.org, ուր կարելի է գտնել նաւապտոյտի մասին ամէն մանրամասնութիւն (արձանագրութիւն, վճարման ձեւ, յայտագիրներ, այլեւայլ յարմարութիւններ…)։
Նաւապտոյտը կը յատկանշուի անով, որ նաւուն 80 սենեակները ամբողջութեամբ յատկացուած են Հ.Մ.Ը.Մ.ականներու, իրենց ընտանիքներուն եւ բարեկամներուն։
Եօթը օրուան ընթացքին նաւապտոյտը պիտի ունենայ հայերէն եւ օտար գեղարուեստական ճոխ յայտագիր, որուն իրենց մասնակցութիւնը պիտի բերեն հանրածանօթ կատակերգակ-դաշնակահար Գեւ Օրգեան, երգիչ Յակոբ Մկրտիչեան եւ DJ Rams (Արամ Գայսէրեան)։
Իւրաքանչիւր սենեակ նախատեսուած է երկու հոգիի համար։ Տրամադրելի են իրենց մեծութեամբ եւ դիրքով 8 տեսակ սենեակներ։ Իւրաքանչիւր անձի մասնակցութեան սակը 2999 ամ․ տոլարէն սկսեալ է (based on double occupancy)։
Նաւապտոյտը ընկերային նախաձեռնութիւն մը ըլլալու կողքին նախատեսուած է, որ եկամուտի աղբիւր մը ըլլայ Հ.Մ.Ը.Մ.ի զանազան ծրագիրներու ծախսերու հոգացման համար։
Նաւապտոյտի արձանագրութեան եւ յաւելեալ մանրամասնութիւններու համար կարելի է դիմել համապատասխան կայքէջին եւ կամ կապուիլ հետեւեալներուն.-