Հ.Մ.Ը.Մ.Ի ՆՈՐ ԱԿՈՒՄԲԻ ԲԱՑՈՒՄ ՎԵՍԹԵՐՈՍԻ ՄԷՋ

Հ.Մ.Ը.Մ.Ի ՆՈՐ ԱԿՈՒՄԲԻ ԲԱՑՈՒՄ ՎԵՍԹԵՐՈՍԻ ՄԷՋ

Շաբաթ, 17 Մայիս 2025-ին, Շուէտի Վեսթերոս քաղաքին մէջ տեղի ունեցաւ Հ.Մ.Ը.Մ.ի տեղւոյն նոր ակումբին բացման պաշտօնական հանդիսութիւնը։

Հանդիսութեան մեկնարկը տրուեցաւ, երբ Հ.Մ.Ը.Մ.ի Վեսթերոսի սկաուտները, ընկերակցութեամբ Հ.Մ.Ը.Մ.ի Սթոքհոլմի շեփորախումբին, ակումբի մուտքին շարուած՝ «Պատուի ա՛ռ»ով ողջունեցին ժողովուրդը։

Հ.Մ.Ը.Մ.ի Վեսթերոսի Մեկուսի շրջանի ատենապետ եղբ. Տիգրան Կէօվշէնեան հրաւիրեց Մկրտիչ Քհնյ. Գրիգորեանը, Հ.Յ.Դ. Բիւրոյի անդամ Յովսէփ Տէր Գէորգեանը, Հ.Մ.Ը.Մ.ի Կեդրոնական Վարչութեան անդամ եղբ. Ֆէտի Գազանճեանը եւ Հ.Յ.Դ. «Հիւսիսեան» կոմիտէի ներկայացուցիչ Սիմոն Տէր Սահակեանը՝ միասնաբար կտրելու կարմիր ժապաւէնը եւ պաշտօնապէս բացուած յայտարարելու ակումբը։

Ապա, վարչութեան մնացեալ անդամները հրաւիրեցին Հ.Մ.Ը.Մ.ի Սթոքհոլմի, Սոտերթելիոյ եւ Օրէպրուի շրջաններու, եկեղեցական խորհուրդներու եւ քոյր միութիւններու ներկայացուցիչները, ինչպէս նաեւ շուէտական կարգ մը կազմակերպութիւններու պատուիրակները եւ հանրութիւնը՝ մուտք գործելու նորաբաց ակումբ։
 
ՅԱՅՏԱԳԻՐԸ
Օրուան յայտագիրը սկիզբ առաւ Շուէտի, Հայաստանի, Արցախի եւ Հ.Մ.Ը.Մ.ի քայլերգներով։ Հանդիսավարներ քոյր Նարինէ Քիրազեան (հայերէն) եւ քոյր Մարինա Կէօվշէնեան (շուէտերէն) ներկաներէն խնդրեցին մէկ վայրկեան յարգել Հայաստանի եւ հայութեան ազատագրութեան պայքարի ճանբուն ինկած բոլոր նահատակներու յիշատակը։

Բարի գալուստի խօսքերով քոյրեր Անի Թովմասեան (հայերէն) եւ Միրնա Գազանճեան (շուէտերէն) դիմեցին ներկաներուն եւ խօսեցան հանդիսութեան հիմնական առիթներուն՝ Մայիս 28-ի, Հ.Մ.Ը.Մ.ի Վեսթերոսի Մեկուսի շրջանի հիմնադրութեան 10-ամեակին եւ Հ.Մ.Ը.Մ.ի նոր ակումբին մասին։

Տեղի ունեցաւ վաւերագրական տեսերիզի ցուցադրութիւն՝ կենդանի մեկնաբանութեամբ քոյրեր Միրնա Սարգիսեանի եւ Նարինէ Քիրազեանի։ Տեսերիզը նուիրուած էր Հ.Մ.Ը.Մ. Վեսթերոսի Մեկուսի շրջանի հիմնադրութեան 10-ամեակին։ Տեսերիզը եւ քոյրերուն հոյակապ մեկնաբանութիւնը զգացական եւ յուզիչ պահեր առթեց ներկաներուն, ինչպէս նաեւ վերյիշել տուաւ Հ.Մ.Ը.Մ.ի մեծ ընտանիքին եւ մասնաւորապէս Վեսթերոսի շրջանին անցեալի ձեռքբերումները եւ միութեան հիմնադրութեան ընդհանուր նպատակները։
 
ՄԵԿՈՒՍԻ ՇՐՋԱՆԻ
ՎԱՐՉՈՒԹԵԱՆ ԽՕՍՔԸ
Այս առիթով, Մեկուսի շրջանի ատենադպիր եղբ. Վազգէն Մարգարեան փոխանցեց վարչութեան խօսքը։ Եղբ. Վազգէն նախ ամփոփ ձեւով խօսեցաւ Հ.Մ.Ը.Մ.ի հիմնադրութեան եւ առաջին տարիներու դիմագրաւած դժուարութիւններուն ու անոնց յաղթահարման մասին։ Ան խօսեցաւ Հ.Մ.Ը.Մ.ի դերին եւ գործին մասին՝ հայակերտման եւ հայեցի դաստիարակութեան ծիրէն ներս։ Եղբայրը յիշեց Հ.Մ.Ը.Մ.ի Վեսթերոսի Մեկուսի շրջանի հիմնադրութեան տարիները եւ տեղւոյն հայութեան դիմագրաւած դժուարութիւնները։ Ան անդրադարձաւ նաեւ սփիւռքահայութեան համար դասական իմաստով ակումբ ունենալու կարեւորութեան մասին եւ դիտել տուաւ, որ ինչո՞ւ եւ ինչպէս՞ շրջանը կարողացաւ ակումբ ունենալ։

Եղբ. Վազգէն շեշտը դրաւ կամաւոր բանակի գաղափարին վրայ եւ ըսաւ, որ Հ.Մ.Ը.Մ.ի Վեսթերոսի Մեկուսի շրջանի անդամները, սկաուտներու ծնողներն ու համակիրները, ընդառաջելով վարչութեան կոչին, բոլորը համախմբուեցան եւ դարձան ազգային բարերարներ՝ օժանդակելով ակումբի ձեռքբերման գործին, որովհետեւ Վեսթերոսի մէջ Հ.Մ.Ը.Մ.ը ազգային դաստիարակութիւն տուող եւ հայու տիպարներ կերտող միակ եւ անմրցելի կազմակերպութիւնն է, իսկ Հ.Մ.Ը.Մ.ի ակումբը կրնայ ըլլալ միակ վայրը, ուր ծնողներ իրենց զաւակները կրնան վստահիլ, այնպէս ինչպէս իրենց տան։ Ան նաեւ ըսաւ, որ ակումբին մէջ պատանիներն ու երիտասարդները պիտի խօսին ու երգեն հայերէն։ Հոս պիտի կասեցուի սերունդներու սպիտակ ջարդը եւ հոս արմատախիլ պիտի ըլլան օտարամոլութիւնը, օտար լեզուները հայերէնէն աւելի սիրելու, օտարին հաճոյանալու եւ օտարէն աւելի օտար ձեւանալու մեր տեսակաւոր հիւանդութիւնները։

Իր խօսքին աւարտին, եղբ. Վազգէն շնորհակալութիւն եւ երախտագիտութիւն յայտնեց բոլոր անոնց, որոնք օժանդակեցին եւ կը շարունակեն իրենց նիւթաբարոյական օժանդակութիւնը բերել Հ.Մ.Ը.Մ.ի Վեսթերոսի Մեկուսի շրջանին՝ տեղւոյն հայութեան ակումբ ունենալու երազը իրականութիւն դարձնելու համար։
 
ԿՈՄԻՏԷԻՆ ԽՕՍՔԸ
Հ.Յ.Դ. «Հիւսիսեան» կոմիտէի ներկայացուցիչ Սիմոն Տէր Սահակեան շրջանի կոմիտէութեան անունով շնորհաւորեց շուէտահայութիւնը ընդհանրապէս եւ Վեսթերոսի հայ համայնքը մասնաւորապէս՝ Հ.Մ.Ը.Մ.ի Վեսթերոսի Մեկուսի շրջանի պատմական այս իրագործումին համար։

Ապա, քոյր Պէթի Քիլէճեան արտասանեց Մուշեղ Իշխանի «Հայաստան» բանաստեղծութիւնը, որմէ ետք եղբ. Յարութ Գազէզեան ջութակով ելոյթ ունեցաւ՝ ներկայացնելով Կոմիտասի «Ալայլուղս» կտորը։
 
ԿԵԴՐՈՆԱԿԱՆ ՎԱՐՉՈՒԹԵԱՆ
ՆԵՐԿԱՅԱՑՈՒՑԻՉԻՆ ԽՕՍՔԸ
Հ.Մ.Ը.Մ.ի Կեդրոնական Վարչութեան անդամ եղբ. Ֆէտի Գազանճեան ներկաներուն փոխանցեց Կեդրոնական Վարչութեան խօսքը։ Ան ըսաւ, որ այս ակումբը միայն տարածք չէ, այլ վայր մը, ուր մեր երեխաներն ու երիտասարդները պիտի ունենան սորվելու, քննարկելու, ծրագրելու առիթ եւ հայ մնալով շուէտահպատակ դառնալու եզակի հնարաւորութիւն։ Ան իր կարգին շնորհաւորեց կատարուած իրագործումը, Հ.Մ.Ը.Մ.ի Վեսթերոսի վարչութիւնը եւ բոլոր անոնք, որոնք քաջաբար աշխատեցան այս օրուան հասնելու համար։
 
Հ.Յ.Դ. ԲԻՒՐՈՅԻ
ԱՆԴԱՄԻՆ ԽՕՍՔԸ
Վերջին խօսքը արտասանեց Հ.Յ.Դ. Բիւրոյի անդամ Յովսէփ Տէր Գէորգեան։ Ան խօսեցաւ Մայիս 28-ի նշանակութեան եւ կարեւորութեան մասին, ըսելով, որ Մայիս 28-ը բացարձակ արժէք է։ Տէր Գէորգեան անդրադարձաւ այս օրերուն Հայաստանը եւ համայն հայութիւնը յուզող հարցերուն, Հայաստանի ղեկին Մայիս 28-ի գաղափարներով առաջնորդուող ազգային իշխանութիւն ունենալու հրամայականին։ Իշխանութիւն, որ կարենայ վերադարձնել հայ ժողովուրդին արժանապատուութիւնը, ատակ ըլլայ թշնամի երկիրներու հետ արժանապատիւ բանակցութիւններ վարելու եւ հայութեան բոլոր իրաւունքները հետապնդելու։ Աւարտելով իր խօսքը, Յովսէփ Տէր Գէորգեան շնորհաւորեց ներկաներուն Մայիս 28-ը,  Հ.Մ.Ը.Մ.ի Վեսթերոսի Մեկուսի շրջանի հիմնադրութեան 10-ամեակը եւ նոր ակումբին բացումը։

ՓԱԿՈՒՄԸ
Աւարտին, Մկրտիչ Քհնյ. Գրիգորեան իր կարգին շնորհաւորեց ներկայ ժողովուրդը, մասնաւորապէս իրեն հարազատ Վեսթերոսի հայութիւնը նոր ակումբի բացման առիթով եւ Գէորգ Սրկ. Գրիգորի հետ «Պահպանիչ»ով փակեց օրուան յայտագիրը։