Հ.Մ.Ը.Մ.Ի ՊԷՅՐՈՒԹԻ ՄԱՍՆԱՃԻՒՂԻՆ ԱՊՐԻԼԵԱՆ ԱՒԱՆԴԱԿԱՆ ՔԱՅԼԱՐՇԱՒԸ
Չորեքշաբթի, 24 Ապրիլ 2025-ին, Հ.Մ.Ը.Մ.ի Պէյրութի մասնաճիւղի սկաուտական բոլոր խումբերը, ծնողներն ու բարեկամները մասնակցեցան մասնաճիւղի աւանդութիւն դարձած պահանջատիրական տողանցքին: Քայլարշաւը ընթացք առաւ Հայաշէնի «Ժողովրդային Տուն»էն, անցնելով «Ազատամարտ» ակումբէն, հասնելով Էշրէֆիէի Հայ Կաթողիկէ Պատրիարքարան, ուր տեղի ունեցաւ ծաղկեպսակի զետեղում՝ Ապրիլեան յուշակոթողին առջեւ, Ցեղասպանութեան մէկուկէս միլիոն սրբադասուած նահատակներու յիշատակին:
Ապա, Արի, Արենոյշ, Երէց եւ Պարմանուհի խումբերը ուղղուեցան Անթիլլիասի Մայրավանք, ուր նաեւ մասնակցեցան տողանցքին եւ Ապրիլեան ոգեկոչման:
