Հ.Մ.Ը.Մ.Ի ՊԷՅՐՈՒԹԻ ՄԱՍՆԱՃԻՒՂԻ 100-ԱՄԵԱԿԻ ԿԱԼԱ-ԸՆԹՐԻՔԸ
Հ.Մ.Ը.Մ.ի Պէյրութի մասնաճիւղի հիմնադրութեան 100-ամեակը մեծ շուքով նշուեցաւ մասնաճիւղի վարչութեան կազմակերպած հանդիսաւոր կալա-ընթրիքին, որ տեղի ունեցաւ 29 Մարտ 2025-ի երեկոյեան ժամը 8.30-ին, Պէյրութի «Ֆենիսիա ինթըրքոնթինենթըլ» պանդոկի մեծ դահլիճին մէջ։
Կալա-ընթրիքին ներկայ էին նախագահ եղբ. Ատոմ եւ քոյր Սելլա Թնճուկեաններ, որոնք յատկապէս այս հանդիսութեան մասնակցելու համար արտասահմանէն ժամանած էին Պէյրութ, Հ.Մ.Ը.Մ.ի Կեդրոնական Վարչութեան ատենապետն ու դիւանի անդամները, Հ.Մ.Ը.Մ.ի Լիբանանի Շրջանային Վարչութեան ատենապետն ու անդամները, Հ.Յ.Դ. Լիբանանի Կեդրոնական Կոմիտէի ներկայացուցիչը, Լիբանանի խորհրդարանի ներկայ եւ նախկին հայ երեսփոխաններ, Պուրճ Համուտի քաղաքապետը, Լիբանանի քոյր մասնաճիւղերու ատենապետներ, անդամներ եւ մասնաճիւղի վեթերան քոյրեր եւ եղբայրներ։
Կալա-ընթրիքը անցաւ ընկերական մտերմիկ ու ջերմ մթնոլորտի մէջ։ Հայրենի արուեստագէտներ Վարդան Պատալեան, Արփի եւ Ալիա Սեդրակեան յաւելեալ փայլք տուին երեկոյին եւ ճոխացուցին մթնոլորտը։
Մասնաճիւղին կողմէ երեկոյին բացման խօսքը արտասանեց վարչութեան ատենադպրուհի քոյր Լուսիկ Աֆարեան։ Ան անդրադարձաւ Հ.Մ.Ը.Մ.ի առաքելութեան, որ եղած է եւ կը մնայ ծառայութիւն՝ ազգին ու հայրենիքին, իսկ Պէյրութի մասնաճիւղը իւրայատուկ դերակատարութիւն ունեցած է համալիբանանեան միութենական առաքելութեան մէջ։
Ան ըսաւ. «Հ.Մ.Ը.Մ.ի Պէյրութի մասնաճիւղը հարիւր տարիներէ ի վեր հաստաբուն կաղնիի նման կանգուն է, միշտ երիտասարդ ու աշխոյժ․ ան տուած է վաստակաշատ մարզիկներ, երախտաւորներ եւ շքանշանակակիրներ, որոնք իրենց անջնջելի կնիքը դրած են Հ.Մ.Ը.Մ.ի փառապանծ պատմութեան տարեգրութեան մէջ»։
Հ.Մ.Ը.Մ.ի Պէյրութի մասնաճիւղի վարչութեան խօսքը արտասանեց ատենապետ եղբ. Զաւէն Տէր Պետրոսեան։ Ան անդրադարձաւ միութեան եւ մասնաճիւղին կատարած ազգապահպանման գործունէութեան եւ շեշտեց մասնաճիւղին վճռակամութիւնը շարունակելու դէպի պանծալի ապագայ։ Ան ըսաւ. «Հ.Մ.Ը.Մ.ի Պէյրութի մասնաճիւղը արդէն թեւակոխած է իր գոյութեան 101-րդ տարին, իր ետին ձգելով հարիւր փառաւոր տարիներու աւանդ՝ նուիրուած հայ սերունդներու դաստիարակութեան եւ ղեկավարներու կերտման»։
Եղբ. Տէր Պետրոսեան իր խօսքը շարունակեց ըսելով. «Մեր մասնաճիւղին 100-ամեայ ուղին լեցուն է յաջողութիւններով, յաղթանակներով եւ փառաւոր հանդիսութիւններով, բայց նաեւ՝ աննախընթաց մարտահրաւէրներով եւ մեծ խոչընդոտներով, որոնք կրնային յանգեցնել որեւէ ուրիշ միութեան մը անկումին կամ ձուլումին, բայց Հ․Մ․Ը․Մ․ Պէյրութը չեղաւ որեւէ այլ միութիւն։ Իւրաքանչիւր անգամ, որ մասնաճիւղին ակումբը վնասուեցաւ, դարձեալ վերաշինուեցաւ։ Իւրաքանչիւր անգամ, որ քաղաքի հայութիւնը գաղթեց, վերապրողները անդամ առ անդամ վերստին հաւաքուեցան։ Այսօր մասնաճիւղին 100-ամեակը կը տօնենք շնորհիւ այն Հ.Մ.Ը.Մ.ականներուն, որոնք երբեք չյուսահատեցան եւ փիւնիկի մոխիրներէն վերակերտեցին այս մասնաճիւղը»։
Այս առիթով իրենց սրտի խօսքը փոխանցեցին եղբ. Ատոմ եւ քոյր Սելլա Թնճուկեանները, որոնք իրենց յուշերով վերապրեցուցին անցեալի քաղցր յիշատակներ։
Պաշտօնական եւ սրտի խօսքերուն նախորդեց Հ.Մ.Ը.Մ.ի Պէյրութի մասնաճիւղին պատմութիւնը ներկայացնող տեսերիզին ցուցադրութիւնը։
Աւարտին, տեղի ունեցաւ 100-ամեակի կարկանդակի հատում։
Նուիրատուութիւններէն գոյացաւ ակնկալուածէն աւելին, որ աւելնալով նախապէս կատարուած նուիրատուութիւններու գումարին վրայ, հասաւ պատկառելի գումարի մը, զոր մասնաճիւղին վարչութիւնը խոստացաւ յատկացնել քաղաքի ակումբի վերանորոգութեան աշխատանքներուն, նոր մարզախաղերու կիրարկման եւ պասքեթպոլի ակադեմիայի հիմնադրութեան։
Բարի երթ կը մաղթենք Հ․Մ․Ը․Մ․ Պէյրութին եւ մեր հայեացքները կը սեւեռենք դէպի նոր, պայծառ, երկրո՛րդ 100-ամեակ։