Հ.Մ.Ը.Մ.Ի ՊՈՒՐՃ ՀԱՄՈՒՏԻ ՄԱՍՆԱՃԻՒՂԻՆ ՋԱՀԵՐԹԸ՝ ՀԱՅՈՑ ՑԵՂԱՍՊԱՆՈՒԹԵԱՆ 110-ԱՄԵԱԿԻՆ ԱՌԻԹՈՎ
Հովանաւորութեամբ Հ.Մ.Ը.Մ.ի Պուրճ Համուտի մասնաճիւղի վարչութեան, կազմակերպութեամբ Հ.Մ.Ը.Մ.ի Պուրճ Համուտի մասնաճիւղի Սկաուտ. Խորհուրդին եւ խմբապետական կազմին, Ուրբաթ, 25 Ապրիլ 2025-ի երեկոյեան տեղի ունեցաւ ջահերթ` ի յիշատակ Հայոց Ցեղասպանութեան մէկուկէս միլիոն սրբադասուած նահատակներու։
Ջահերթը սկսաւ Հ.Յ.Դ. «Սարդարապատ» ակումբէն։ Մասնաճիւղին անդամները ջահերով, պահանջատիրական նշանախօսքերով պաստառներ բռնելով եւ կանչերով տողանցեցին Պուրճ Համուտի մէջ։ Անոնք ուղղուեցան Պուրճ Համուտի հրապարակ, ուր կանգնած էր Հայոց Ցեղասպանութեան 110-ամեակին նուիրուած խորհրդանշական ձեռային մը։
Ջահերթէն ետք, Պուրճ Համուտի հրապարակին վրայ տեղի ունեցաւ Հայոց Ցեղասպանութեան 110-ամեակի նշում եւ գեղարուեստական յայտագիր՝ պատրաստուած մասնաճիւղի սկաուտներուն կողմէ։ Լիբանանի, Հայաստանի, Արցախի եւ «Ով հայ արի» քայլերգներու ունկնդրութենէն ետք, մասնաճիւղի սկաուտութեան խօսքը փոխանցեց Հ.Մ.Ը.Մ.ի Պուրճ Համուտի մասնաճիւղի խմբապետ` քոյր Էւա Ղազարեան։
Քոյրը իր խօսքին մէջ ըսաւ, որ Հայոց Ցեղասպանութեան նշումը եզակի առիթ մըն է համայն աշխարհին յիշեցնելու, որ 1915-ին հայը տեղահան ըլլալով` հաստատուեցաւ օտար երկիրներու մէջ, իբրեւ անտէր ու անօթեւան, սակայն հակառակ այս բոլորին, հայու աննկուն կամքին շնորհիւ` օտար երկիրներու մէջ եւս կառուցեց տուներ, եկեղեցիներ, դպրոցներ, ակումբներ, մշակութային եւ մարզական միութիւններ։ Զանազան ցամաքամասերու մէջ կառուցուեցան «փոքրիկ Հայաստան»ներ։
Քոյր Ղազարեան խոր վիշտով անդրադարձաւ Արցախի մէջ կատարուած ցեղային զտումին եւ հայ գերիներու ապօրինաբար Պաքուի մէջ բանտարկութեան եւ նշեց, որ հակառակ այս բոլորին, մենք իբրեւ պահանջատէր եւ Ցեղասպանութեան ենթարկուած ազգի ժառանգորդներ պէտք է շարունակենք աննահանջ պայքարիլ մինչեւ որ հայ ժողովուրդը տիրանայ իր արդար իրաւունքներուն։ 1.5 միլիոն սրբադասուած նահատակներու արեան կանչը կը սպասէ մեր պոռթկումին, ըսելով «Ելէ’ք հայեր, Ելէ’ք պայքարի, Բաւ է’ տանջուենք, բաւ է’ լռենք»։
Իր խօսքը եզրափակելով՝ մասնաճիւղին խմբապետը ընդգծեց, որ սփիւռքահայութեան սիրտին մէջ, Պուրճ Համուտի հրապարակին վրայ կագնած, կը վերանորոգենք մեր ուխտը` շարունակելու համար մեր աննահանջ պայքարը։ Կը դատապարտենք ցարդ անպատիժ մնացած Թուրքիոյ ոճրագործութիւնները եւ համայն աշխարհէն կը պահանջենք արդարութիւն եւ հայ ժողովուրդի իրաւունքներու հատուցում։ Մեր հաւաքական լռութիւնը մեզի կ’առաջնորդէ անկումի։ Հետեւաբար, ո’չ լռութեան, ո’չ բռնատիրութեան, ո’չ ստրկութեան, ո’չ զիջումնային-յանձնուողական քաղաքականութեան եւ ո’չ նորանոր ցեղասպանութեան, շեշտեց քոյրը։
Խօսքին յաջորդեց գեղարուեստական յայտագիր։ Արենոյշ խումբի անդամները արտասանեցին Վահան Տէրեանի «Մի՛ խառնէք մեզ» քերթուածը, «Շուշի» պարմանուհի փաղանգի անդամները պարեցին Նազպար մը, իսկ Արի խումբէն անդամներ նուագեցին «Թող հնչէ շեփոր» երգը։
Աւարտին, մասնաճիւղին անդամները հաւաքաբար երգեցին «Պիտ պաշտպանեմ» երգը։
Յայտագիրը աւարտեցաւ «Յառաջ նահատակ» քայլերգով։
