Հ.Մ.Ը.Մ.Ի ՎԱԼԱՆՍԻ ՄԱՍՆԱՃԻՒՂԻ ԱՐԻ-ԱՐԵՆՈՅՇՆԵՐՈՒ ԵՐԿՕՐԵԱՅ ՍԵՄԻՆԱՐԸ
Հ.Մ.Ը.Մ.ի Վալանսի մասնաճիւղի արի-արենոյշներու երկօրեայ սեմինարը տեղի ունեցաւ Մարտ ամսուան վերջին շաբաթավերջին, 29 եւ 30 Մարտին։
Սեմինարին առաջին օրը լեցուն էր ուրախ եւ յիշարժան պահերով։ Սկսանք սեմինարի բացումով, ապա լրացուցինք «Նորագիր»ը։ Այնուհետեւ, կարգը հասաւ խաղերուն եւ շարքերու փորձին՝ պատրաստուելու համար փողկապի արարողութեան, որուն իւրաքանչիւր սկաուտ կը սպասէ լրջութեամբ եւ ոգեւորութեամբ։
Երեկոյեան, պատիւը ունեցանք վայելելու համեղ փիցցան, որմէ ետք օրը աւարտեցինք տեսերիզի ցուցադրութեամբ։ Ապա, իւրաքանչիւրը մտաւ իր քնապարկը…։
Սեմինարին երկրորդ օրը զարթնումը եղաւ բաւական դժուար։ Այսուհանդերձ, օրը սկսանք լաւ տրամադրութեամբ։ Առաջին հերթին, քայլարշաւ մը կատարեցինք դէպի Սուրբ Սահակ եկեղեցի։ Եկեղեցւոյ մէջ արի-արենոյշները ունեցան հոգեւոր մտամփոփումի պահեր։
Վերադարձին, քիչ մը հանգստանալէ ետք, վերջնականացան շարքերու փորձերը՝ պատրաստուելու համար խոստման արարողութեան, որ սեմինարին ամէնէն կարեւոր պահերէն մէկն էր։ Քիչ մը խաղեր խաղալէ եւ նոր ուժ ստանալէ ետք, օրը աւարտեցինք Հայ Մշակութային Տունը մաքրելով։