Հ.Մ.Ը.Մ.Ի ՔԵՍԱՊԻ ՄԱՍՆԱՃԻՒՂԸ ՀԱՆԴԻՍՈՒԹԵԱՄԲ ՄԸ ՆՇԵՑ «ՄՈԿԼԻԻ ՕՐ»Ը
Հովանաւորութեամբ Հ.Մ.Ը.Մ.ի Քեսապի մասնաճիւղի վարչութեան, կազմակերպութեամբ Հ.Մ.Ը.Մ.ի Քեսապի մասնաճիւղի Սկաուտ. Խորհուրդին եւ խմբապետական կազմին, ներկայութեամբ Հ.Մ.Ը.Մ.ի Սուրիոյ Շրջանային Վարչութեան ներկայացուցիչին, Շրջանային Սկաուտ. Խորհուրդի անդամներուն եւ խմբապետութեան, Չորեքշաբթի, 4 Յունիս 2025-ին, «Սարդարապատ» սրահին մէջ տեղի ունեցաւ «Մոկլիի օր»ուան հանդիսութիւն։
Հանդիսութիւնը սկիզբ առաւ գայլիկ-արծուիկներու մուտքով, որմէ ետք հնչեց Հայաստանի քայլերգը։ Բացման խօսքը արտասանեց գայլիկ-արծուիկ միաւորի Աքելլայ` քոյր Շաղիկ Լընդեան-Ղազարեան։
Գեղարուեստական յայտագիրը սկիզբ առաւ «Մեծ կանչ»ով, որուն յաջորդեցին պար, չափական մարզանք, զաւեշտ, հայկական պար, ազգային երգեր, Հ.Մ.Ը.Մ.ական կանչեր, բուրգ եւ թմպլիկ։
Աւարտին տեղի ունեցաւ խմբապետի աստիճանի տուչութիւն ձեռամբ` Սուրիոյ Շրջանային Խմբապետուհի քոյր Թամար Աւետեան-Գատէհճեանի եւ Շրջանային խմբապետ եղբ. Ռաֆֆի Կարապետեանի։
Խմբապետի աստիճան ստացան քոյր Լուսին Քիւրքճեան, եղբայրներ Անդրանիկ Հանէսքէհեան եւ Յովսէփ Բէնդէզեան։
Հանդիսութիւնը փակուեցաւ «Ով հայ արի» սկաուտական քայլերգով։
