Հ.Մ.Ը.Մ.-ՖՐԱՆՍԻ «ՀԱՅ ՍԿԱՈՒՏԻ ՕՐ»Ը

Հ.Մ.Ը.Մ.-ՖՐԱՆՍԻ «ՀԱՅ ՍԿԱՈՒՏԻ ՕՐ»Ը

25 Մայիս 2025-ին, Հ.Մ.Ը.Մ.-Ֆրանսի մեկուսի շրջանը մեծ խանդավառութեամբ նշեց «Հայ սկաուտի օր»ը, որ կազմակերպուած էր Սկաուտ. Խորհուրդի եւ խմբապետական կազմին կողմէ։ Հանդիսութեան ներկայ էին Իսի Լէ Մուլինոյի փոխ քաղաքապետ Արթիւր Խանճեան, Հ.Մ.Ը.Մ.ի Կեդրոնական Վարչութեան անդամ եղբ. Սեւակ Թորոսեան, շրջանի Սկաուտ. Խորհուրդն ու վարչութիւնը եւ սկաուտներու ծնողները։

Հանդիսութիւնը բացուեցաւ Հ.Մ.Ը.Մ.-Ֆրանսի նուագախումբով։ Թմբուկներու ինքնավստահ հարուածները թափ տուին ձեռնարկին, ինչպէս նաեւ՝ գայլիկ-արծուիկ, արի-արենոյշ եւ նորակազմ երէց-պարմանուհի խումբերու տողանցքին։

Ազգային քայլերգներու երգեցողութեան եւ մեկուսի շրջանի խմբապետուհի քոյր Կասիա Վէքիլեանի բարի գալուստի խօսքին յաջորդեց կարգերու տուչութեան արարողութիւնը, գնահատականներու եւ պէճերու բաշխումը, ինչպէս նաեւ խմբապետական կազմի աստիճանատուչութիւնը։ Արարողութիւններէն ետք հանդիսութեան գլխաւոր խօսքը առաւ Սկաուտ. Խորհուրդի ատենապետուհի քոյր Կարինէ Սիսեռեան։

Խօսքեր արտասանեցին նաեւ վարչութեան ատենապետ եղբ. Անտրէ Տատայեան, Հ.Մ.Ը.Մ.ի Կեդրոնական Վարչութեան անդամ եղբ. Սեւակ Թորոսեան եւ Իսի Լէ Մուլինոյի փոխ քաղաքապետ Արթիւր Խանճեան։

Ձեռնարկը շարունակուեցաւ ծնողական յանձնախումբին կողմէ կազմակերպուած ուտելիքի ճոխ վաճառքով եւ հաճելի մթնոլորտով։ Վերջապէս, հանդիսութիւնը փակուեցաւ Հ.Մ.Ը.Մ.-Ֆրանսի սկաուտներուն կողմէ պատրաստուած գեղարուեստական յայտագիրով մը, որ ընդգրկեց պար, երգ, թատերական կարճ ներկայացումներ, բուրգի կազմութիւն եւ երէց-պարմանուհիներու վազքայլ։