ՁՄԵՌՆԱՅԻՆ ԲԱՆԱԿՈՒՄ՝ ԹՈՐՈՆԹՈՅԻ ՄԷՋ
Բանակումները կարծէք եզրափակիչ յայտագիրներն են սկաուտական տարուան մը գործունէութեան։ Իւրաքանչիւր սկաուտ անպայման անմոռանալի ժամեր կամ յիշատակներ ունեցած է բանակումներու ընթացքին։
Ձմեռնային բանակումները տարբեր երանգ ունին, մանաւանդ Գանատայի տարածքին։ Ցուրտը, հովը եւ ձիւնածածկ դաշտերը կարծէք լիովին կ'ամբողջացնեն ձմեռային բանակումներուն իմաստը։
Հովանաւորութեամբ Հ.Մ.Ը.Մ.ի Թորոնթոյի մասնաճիւղի վարչութեան, կազմակերպութեամբ մասնաճիւղի Սկաուտ. Խորհուրդին եւ խմբապետութեան, 7-9 Յունուար 2025-ին, տեղի ունեցաւ ձմեռնային բանակում մը՝ «Camp Samac» բանակավայրին մէջ, մասնակցութեամբ 200 սկաուտ քոյրեր-եղբայրներու։
Բանակումը սկիզբ առաւ Երեքշաբթի, 7 Յունուարի յետմիջօրէին, դրօշակի արարողութեամբ եւ «Ով հայ արի» քայլերգով ։
Եռօրեայ բանակումը կը ձգտէր մէկ նպատակի` բանակողներուն վարժեցնել ի՞նչպէս դիմադրել բնութեան պաղին ու ցուրտին, երբ կը գտնուին անպաշտպան ոամ բացօթեայ տեղ մը։ Այս գործնական աշխատանքին միջոցով սկաուտները սորվեցան տախտակ կտրելու եւ տնակ կառուցելու ձեւերը, կրակարաններու գործածութիւնը եւ ճաշ պատրաստելու միջոցները։
Բանակումի ընթացքին քոյրերն ու եղբայրները հետախուզական նշաններով արշաւներ կատարեցին եւ օգտագործեցին մորսի ծածկագիրը։ Պարմանուհիներու փաղանգը սորվեցաւ ի՞նչպէս սկաուտական պէճեր կարել տարազին կամ վերարկուին վրայ։ Անոնք կաւագործութեան որոշ ցուցմունքներ ստանալով պատրաստեցին սկաուտի տարազով կաւէ արձանիկներ, իսկ գայլիկները սորվեցան կարկանդակ պատրաստելու եւ թխելու կանոններ։ Անոնք բուրդի թելերով գայլի գլխու պատկերը աշխատեցան, վեցեակներու դրօշները պատրաստեցին, կարեցին եւ վրան զետղուած պատկերները փակցուցին։ Եզակի էին պարմանուհիներու պատրաստած խմորեղէները։ Անոնք, առանց խօսելու, առանց տեսնելու եւ առանց լսելու, պատրաստեցին համադամ խմորեղէններ։
Բանակողները դահոյկներով կատարեցին ձիւնի խաղեր եւ բերկրանքի պահեր ապրեցան վայելելով բնութեան պարգեւած բարիքները։
Ռատիոժամի մնայուն յայտագիրը եւ ճաշի ժամուն մատուցուած գիտելիքներն ու հարցում-պատասխանի մրցումները բարձր տրամադրութիւն եւ խանդավառութիւն ստեղծեցին բանակողներուն մօտ։
Բանակումի ընթացքին տեղի ունեցաւ գայլիկ-արծուիկ վոհմակ-երամի խոստման արարողութիւն եւ թեկնածուները ստացան իրենց փողկապները։
Բանակումի աւարտին երէց-պարմանուհիներու փաղանգը գնահատուեցաւ իր պարտաճանաչութեան՝ փոխանցուած հրահանգները անմիջապէս կատարելու եւ մաքրութեան օրէնքներուն բծախնդրօրէն հետեւելու համար։ Այս գնահատականը խթան հարդիսացաւ, որպէսզի մնացեալը աւելի բծախնդրօրէն հետեւին եւ կատարեն տրուած բոլոր հրահանգները։
Աշխոյժ եւ արագընթաց մթնոլորտի մէջ ընթացող եռօրեայ ձմեռնային բանակումը քաղցր յուշերով եւ ամբարուած գիտելիքներով վերջ գտաւ Կիրակի, 9 Յունուարի յետմիջօրէին։