ՃԱՆՉՆԱՆՔ «ԱՐԺԱՆԵԱՑ» ՇՔԱՆՇԱՆԱԿԻՐ ԵՂԲ. ՕՇԻՆ ՓԻՐՈՒՄԵԱՆ
<p>Եղբ. Օշին Փիրումեան ծնած է Թեհրան, 12 Յունուար 1968-ին։ Սկաուտական շարքերու անդամագրուած է 1974-ին, Թեհրանի Հայ Մշակութային «Արարատ» Կազմակերպութեան ճամբով։ 1978 Դեկտեմբերին տեղափոխուած է Մ. Նահանգներ եւ փոխանցուած է տեղւոյն Հ.Մ.Ը.Մ.ի «Արարատ» մասնաճիւղի սկաուտական բաժանմունք՝ հասնելով մինչեւ մասնաճիւղի խմբապետի պաշտօնին։ 1988-2006 ան ստանձնած է պատասխանատու զանազան պաշտօններ՝ նշանակուած է մասնաճիւղի Սկաուտ. Խորհուրդի, Շրջանային Սկաուտ. Խորհուրդի անդամ։ Ընտրուած է մասնաճիւղի վարչութեան, ապա՝ Արեւմտեան Մ. Նահանգներու Շրջանային Վարչութեան անդամ։ </p><p> Սկաուտական աշխոյժ գործունէութեան տարիներուն, 1991-1992, իբրեւ խմբապետ ան մաս կազմած է սկաուտական առաջին խումբին, որ Մ. Նահանգներէն մայր հայրենիք գործուղուած է Հ.Մ.Ը.Մ.ը Հայաստանի մէջ վերահիմնադրելու համար, կազմակերպելով սկաուտական առաջին բանակումները այնտեղ։</p>
<p> Եղբ. Օշին Փիրումեան 2006-ին հաստատուած է հայրենիք, այնուհետեւ իր բեղմնաւոր աշխատանքը շարունակելով իբրեւ Հ.Մ.Ը.Մ.-ՀԱՍԿ-ի անդամ։ Ան երեք շրջան ընտրուած է Հ.Մ.Ը.Մ.-ՀԱՍԿ-ի Կեդրոնական Վարչութեան անդամ, շրջան մը վարելով ատենապետի պաշտօն։</p>
<p> Հ.Մ.Ը.Մ.ի Կեդրոնական Վարչութեան կողմէ նշանակուած է համա-Հ.Մ.Ը.Մ.ական 8-րդ բանակումի գործադիր մարմինի անդամ (2006) եւ 9-րդ բանակումի ընդհանուր խմբապետ (2010)։ Ան նշանակուած է նաեւ համա-Հ.Մ.Ը.Մ.ական 8-րդ (2009) եւ 9-րդ մարզախաղերու (2013) կազմակերպիչ յանձնախումբի անդամ։ Եղբ. Օշին Փիրումեան, իբրեւ Հ.Մ.Ը.Մ.ի Արեւմտեան Մ. Նահանգներու եւ Հ.Մ.Ը.Մ.-ՀԱՍԿ-ի պատգամաւոր, մասնակցած է Պատգամաւորական չորս Ընդհանուր Ժողովի եւ երկու անգամ ընտրուած է Հ.Մ.Ը.Մ.ի Կեդրոնական Վարչութեան անդամ՝ 2015-2019 եւ 2019-2023։</p>
<p> Եղբ. Օշին Փիրումեան ամուսնացած է եւ ունի երեք զաւակ՝ երկու մանչ եւ մէկ դուստր։</p>
