ՑԱՄԱՔԱՄԱՍԱՅԻՆ ԱՌՑԱՆՑ ՍԵՄԻՆԱՐՆԵՐԸ ՀԱՍՏԱՏԵՑԻՆ ՄԻՈՒԹԵԱՆ ՔԱՐՈԶՉԱԿԱՆ ՀԱՄԱԿԱՐԳԻՆ ԳԼԽԱՒՈՐ ՀԻՄԵՐԸ

ՑԱՄԱՔԱՄԱՍԱՅԻՆ ԱՌՑԱՆՑ ՍԵՄԻՆԱՐՆԵՐԸ ՀԱՍՏԱՏԵՑԻՆ ՄԻՈՒԹԵԱՆ ՔԱՐՈԶՉԱԿԱՆ ՀԱՄԱԿԱՐԳԻՆ ԳԼԽԱՒՈՐ ՀԻՄԵՐԸ

Միութեան քարոզչական պատասխանատուներու առցանց երկրորդ սեմինարէն հինգ ամիս ետք (Տեսնե՛լ «Մարզիկ», թիւ 435, էջ 47-49), յաջորդական երեք Ուրբաթ օրեր, 28 Մարտ, 4 եւ 11 Ապրիլ 2025-ին, Հ.Մ.Ը.Մ.ի Կեդրոնական Վարչութեան քարոզչական յանձնախումբին կազմակերպութեամբ տեղի ունեցան ցամաքամասային առցանց երեք սեմինարներ, որոնց մասնակցեցան Ամերիկայի եւ Աւստրալիոյ ցամաքամասերու, Եւրոպայի եւ Միջին Արեւելքի Շրջանային, Մեկուսի եւ մասնաճիւղերու վարչութիւններու 15 ներկայացուցիչները։
Իւրաքանչիւր սեմինարի աւարտին ստեղծուեցաւ տուեալ ցամաքամասի յատուկ ցանցային հարթակ մը, որպէսզի մասնակիցներուն միջեւ գործակցութիւնը ստանայ անմիջական եւ գործնական արտայայտութիւն։

 
ԱՌԱՋԻՆԸ. Մ. ՆԱՀԱՆԳՆԵՐՈՒ, ԳԱՆԱՏԱՅԻ
ԵՒ ԱՒՍՏՐԱԼԻՈՅ ՇՐՋԱՆՆԵՐՈՒ ՄԱՍՆԱԿՑՈՒԹԵԱՄԲ
Առաջին սեմինարը կատարուեցաւ երկու օրուան վրայ՝ Ուրբաթ, 28 եւ Շաբաթ, 29 Մարտ 2025-ի երեկոյեան ժամը 7-ին (Լոս Անճելըսի Ժամով)։ Մասնակցեցան Մ. Նահանգներու Արեւելեան եւ Արեւմտեան, Գանատայի, Հարաւային Ամերիկայի եւ Աւստրալիոյ շրջաններու քարոզչական 15 պատասխանատուները։

Կազմակերպիչ յանձնախումբի ներկայացուցիչին բարի գալուստի խօսքէն ետք, Հ.Մ.Ը.Մ.ի Կեդրոնական Վարչութեան խօսքը փոխանցեց եղբ. Վիգէն Աւագեան։ Ան ողջունեց մասնակիցները եւ ներկայացուց սեմինարին նպատակը, որն է՝ ստեղծել համաչափ ձեւով, յստակ ուղղութեամբ եւ արժեչափերով համա-Հ.Մ.Ը.Մ.ական հանրային կապերու քարոզչական համակարգ մը։ Եղբայրը ընդգծեց ցամաքամասային յատուկ ռազմավարութեան եւ համագործակցութեան ծրագիրի մշակման կարեւորութիւնը:

Ապա, համա-Հ.Մ.Ը.Մ.ական քարոզչական առցանց երկրորդ սեմինարի եզրակացութիւններու լոյսին տակ, երկու օրուան վրայ նիստերու ընթացքին արծարծուեցան հետեւեալ նիւթերը.-

• Հ.Մ.Ը.Մ.ի համաշխարհային պրէնտային ինքնութիւնը հանրութեան ներկայացնելու, շրջաններու յարմարեցումներ կատարելու անհրաժեշտութիւնը եւ գործիքները:
• Նպատակային լսարանի գրաւման եւ ընդլայնման ձեւերու որդեգրում՝ օգտագործելով նորարար գործիքներ, ազդեցութեան եւ հասանելիութեան թուային չափանիշեր:
• Գաղութային եւ տեղական պաշտօնական լրատուական միջոցներու հետ սերտ յարաբերութիւններու պահպանում եւ զօրացում:
• Ընկերային ցանցերու վրայ միութեան արժէքները արտացոլացնող, պատմութիւն ունեցող բովանդակութեան (content with narrative) պատրաստութիւն եւ տարածում:
• Ճգնաժամերու յատուկ ընկերային ցանցերու կառավարման ծրագիրի մշակում:
• Ցամաքամասային միջ-մասնաճիւղային փորձառութեան եւ հանրային կապերու վերաբերեալ ներքին բովանդակութեան փոխանակման հարթակի ստեղծում:

 
ԵՐԿՐՈՐԴԸ. ԵՒՐՈՊԱՅԻ
ՇՐՋԱՆՆԵՐՈՒ ՄԱՍՆԱԿՑՈՒԹԵԱՄԲ
Երկրորդ սեմինարը կատարուեցաւ Ուրբաթ, 4 Ապրիլ 2025-ի երեկոյեան ժամը 8-ին (Փարիզի ժամով), մասնակցութեամբ Հ.Մ.Ը.Մ.ի Եւրոպայի ցամաքամասի Շրջանային, Մեկուսի եւ մասնաճիւղերու քարոզչական 25 պատասխանատուներու եւ Կեդրոնական Վարչութեան կարգ մը անդամ անդամներու։

Իբրեւ նորութիւն, համա-Հ.Մ.Ը.Մ.ական ձեռնարկի մը առաջին անգամ ըլլալով իրենց մասնակցութիւնը բերին Հ.Մ.Ը.Մ.ի Նիսի նորակազմ մասնաճիւղի հիմնադիր կարգ մը անդամները։ Զանոնք ներկայացուց եւ միութեան կառոյցէն ներս բարի գալուստ մաղթեց Կեդրոնական Վարչութեան Եւրոպայի ներկայացուցիչ եղբ. Ֆէտի Խաժակ Գազանճեան։

Ապա, Կեդրոնական Վարչութեան անդամ եղբ. Վիգէն Աւագեան նշեց, որ Հ.Մ.Ը.Մ.ի Պատգամաւորական վերջին Ընդհանուր Ժողովը քարոզչութիւնը նկատեց միութեան նպատակին հասնելու միջոցներէն մէկը։ Հետեւաբար, անհրաժեշտ է այդ միջոցին ձեւն ու աշխատանքի եղանակը յստակացնել ընդհանուր սկզբունքներով եւ շրջանային պայմաններու յատուկ պատշաճեցումներով։

Այդ պատճառով ալ կը գումարուին ցամաքամասային քարոզչական սեմինարներ, որպէսզի աշխատանքի եղանակի յստակացումով կազմուի միութեան քարոզչական համակարգը՝ մասնաճիւղեր-Մեկուսի եւ Շրջանային Վարչութիւններ-Կեդրոնական Վարչութիւն ուղղահայեաց եւ հորիզոնական կապերով։

Եղբ. Աւագեանի խօսքէն ետք, սեմինարը ընթացք առաւ չորս տարբեր նիւթով.-

• - Հ.Մ.Ը.Մ.ի համաշխարհային պրէնտային ինքնութիւնը հանրութեան ներկայացնելու, շրջաններու յարմարեցումներ կատարելու անհրաժեշտութիւնը եւ գործիքները- զեկուցաբեր՝ եղբ. Գէորգ Յակոբճեան։
• Նպատակային լսարանի գրաւման եւ ընդլայնման ձեւերու որդեգրում,օգտագործելով նորարար գործիքներ, ազդեցութեան եւ հասանելիութեան թուային չափանիշեր- զեկուցաբեր՝ եղբ. Նժդեհ Մկրտիչեան։
• Գաղութային եւ տեղական պաշտօնական լրատուական միջոցներու հետ սերտ յարաբերութիւններ պահպանել ու զօրացնել- զեկուցաբեր՝ եղբ. Վիգէն Աւագեան։

Սեմինարը վարեց քոյր Աստղիկ Աշըգեան։ Իր փորձառութիւններով սեմինարը հարստացուց Հ.Մ.Ը.Մ.ի Կեդրոնական Վարչութեան Ֆրանսայի ներկայացուցիչ եղբ. Սեւակ Թորոսեան։
Յայտնենք, որ Հ.Մ.Ը.Մ.ի Կեդրոնական Վարչութեան նաւապտոյտի յանձնախումբին կողմէ սեմինարի առաջին բաժինին մասնակցեցաւ եւ նաւապտոյտի քարոզչական աշխատանքներուն մասին խօսեցաւ քոյր Լոռի Փիլիպոսեան։

Երկու ժամուան սեմինարը աւարտեցաւ մասնակիցներու կողմէ օգտակար ու գործնական շարք մը առաջարկներով։
 
ԵՐՐՈՐԴԸ. ՄԻՋԻՆ ԱՐԵՒԵԼՔԻ
ՇՐՋԱՆՆԵՐՈՒ ՄԱՍՆԱԿՑՈՒԹԵԱՄԲ
Ուրբաթ, 11 Ապրիլ 2025-ի երեկոյեան իրենց աւարտին հասան Հ.Մ.Ը.Մ.ի Կեդրոնական Վարչութեան քարոզչական յանձնախումբին կազմակերպած ցամաքամասային առցանց սեմինարները, որոնց վերջինը համախմբեց միութեան Միջին Արեւելքի քարոզչական 25 պատասխանատուները։

Սեմինարին անակնկալը եղաւ Համահայկական Խաղերու Համաշխարհային Կոմիտէի նախագահին ողջոյնի խօսքը մասնակիցներուն։ Արդարեւ, Համահայկական Խաղերու Համաշխարհային Կոմիտէի նախագահ Իշխան Զաքարեան, որ պատուիրակութեամբ մը նոյն ժամուն պաշտօնական այցելութիւն կը կատարէր Հ.Մ.Ը.Մ.ի Կեդրոնական Վարչութեան կեդրոն, առցանց ողջունեց սեմինարին մասնակիցները, յաջողութիւն յայտնեց անոնց աշխատանքներուն եւ մաղթեց, որ համահայկական խաղերու ճամբով մեծ թիւով երիտասարդ-երիտասարդուհիներ կ’այցելեն հայրենիք։

Սեմինարը, ինչպէս նախորդները, ունեցաւ զեկուցական եւ քննարկման բաժին։ Սեմինարը վարեց Հ.Մ.Ը.Մ.ի Կեդրոնական Վարչութեան քարոզչական յանձնախումբի անդամ քոյր Նայիրի Ազարիկեան։ Զեկուցումներ ներկայացուցին յանձնախումբի անդամներ՝ եղբայրներ Գէորգ Յակոբճեան (Մ. Նահանգներ), Նժդեհ Մկրտիչեան (Հայաստան), Աստղիկ Աշըգեան (Գանատա) եւ Հ.Մ.Ը.Մ.ի Կեդրոնական Վարչութեան անդամ եղբ. Վիգէն Աւագեան, որ արտասանեց նաեւ սեմինարին բացման խօսքը։

Զեկուցումներու աւարտին տեղի ունեցաւ աշխոյժ քննարկում եւ միտքերու փոխանակում՝ քարոզչական արդիական եւ ազդու ձեւերու, ներքին եւ արտաքին լսարաններուն հասնելու եղանակներուն, Միջին Արեւելքի պայմաններուն պատշաճող աշխատելաոճի որդեգմրան եւ միութենական քարոզչութեան հիմնական սկզբունքներու շուրջ։